തൃശൂര്‍: വനപാലകര്‍ സഞ്ചരിച്ച ജീപ്പ് കാട്ടാന ആക്രമിച്ചു. അതിരപ്പിള്ളി കണ്ണംകുഴിയിലാണ് സംഭവം. രണ്ടു പേര്‍ക്ക് പരിക്കേറ്റു.
ചാര്‍പ്പ റേഞ്ചിലെ കണ്ണംകുഴി ഫോറസ്റ്റ് സ്‌റ്റേഷനിലെ ഉദ്യോഗസ്ഥര്‍ സഞ്ചരിച്ച ജീപ്പിന് നേരെയാണ് ആക്രമണം നടന്നത്.
പരിക്കേറ്റ സെക്ഷന്‍ ഫോറസ്റ്റ് ഓഫീസര്‍ കായംകുളം ചേരാവള്ളി ലിയാന്‍ മന്‍സില്‍ റിയാസ് (37), ഫോറസ്റ്റ് വാച്ചര്‍ വെറ്റിലപ്പാറ കിണറ്റിങ്കല്‍ ഷാജു (47) എന്നിവരെ ചാലക്കുടി താലൂക്ക് ആശുപത്രിയില്‍ പ്രവേശിപ്പിച്ചു.
വാഴച്ചാല്‍ വനം ഡിവിഷന്‍ അതിര്‍ത്തിയായ കുണ്ടൂര്‍മേടില്‍ പരിശോധന നടത്തിയ ശേഷം മടങ്ങും വഴി ബടാപാറക്കടുത്തായിരുന്നു സംഭവമുണ്ടായത്. വളവ് തിരിഞ്ഞ് വരികയായിരുന്ന ജീപ്പില്‍ കാട്ടാന ഇടിച്ചതിനെ തുടര്‍ന്ന് റിയാസ് പുറത്തേക്ക് തെറിച്ചുവീണു.
വീഴ്ചയ്‌ക്കിടയില്‍ ആനയുടെ ചവിട്ടേറ്റ് റിയാസിന് പരിക്കേറ്റു.ജീപ്പിന്റെ കമ്പിയിലിടിച്ച് ഷാജുവിന്റെ തലയ്‌ക്കും പരുക്കേറ്റു. അഞ്ചു തവണ ജീപ്പ് കുത്തി മറിച്ചിട്ടശേഷം ആന കാടുകയറുകയായിരുന്നു.
