തൃശ്ശൂര്: ബി.ജെ.പി. മുന് ഓഫീസ് സെക്രട്ടറി തിരൂര് സതീശ് മുഖ്യമന്ത്രി പിണറായി വിജയന്റെ ടൂൾ ആണെന്ന് ബിജെപി നേതാവ് ശോഭാ സുരേന്ദ്രൻ. നാവ് സതീശൻ്റേതാണെങ്കിലും പ്രവർത്തിക്കുന്നത് എകെജി സെൻ്ററിൽ നിന്നാണെന്നും ശോഭ തുറന്നടിച്ചു. കുഴൽപ്പണ കേസുമായി ബന്ധപ്പെട്ട ഒരു വിവരവും സതീഷൻ തന്നോട് പറഞ്ഞിട്ടില്ല. തനിക്കെതിരെ പറഞ്ഞ കാര്യങ്ങളുടെ തിരക്കഥ എകെജി സെൻററിൽനിന്നും എഴുതിക്കൊടുത്തതാണെന്നും ശോഭാ സുരേന്ദ്രൻ പറഞ്ഞു.
സതീശന് എന്ന ഉപകരണത്തെ ഉപയോഗിച്ചുകൊണ്ട് ബിജെപിയെന്ന പ്രസ്ഥാനത്തെ തകര്ക്കുകയാണ് ലക്ഷ്യമെന്നും അതുവഴി ഒരുവെടിക്ക് രണ്ടുപക്ഷികളെ തീര്ക്കാന് സാധിക്കുമോ എന്ന് ഗവേഷണം നടത്തുകയാണെന്നും ശോഭാ സുരേന്ദ്രന് കുറ്റപ്പെടുത്തി. കുഴൽപ്പണവുമായി ബന്ധപ്പെട്ട വെളിപ്പെടുത്തലിന് ശേഷം പല നേതാക്കളും വിളിച്ചുവെന്നാണ് സതീശൻ പറയുന്നത്. എന്തുകൊണ്ടാണ് അവരുടെ പേരുവിവരം വെളിപ്പെടുത്താത്തത്. ഏത് നമ്പറിൽ നിന്നാണ് സതീശൻ തന്നെ വിളിച്ചത്. അതിന്റെ കോൾലിസ്റ്റ് ഹാജരാക്കണമെന്നും ശോഭാ സുരേന്ദ്രൻ ആവശ്യപ്പെട്ടു.
സതീശനെ വിലയ്ക്കെടുത്തിട്ട് ഒരുവര്ഷത്തിലേറെയായി. ബി.ജെ.പിയില് സംസ്ഥാന പ്രസിഡന്റാവുന്നതിനായി താൻ സതീശനെക്കൊണ്ട് ഇക്കാര്യം പറയിപ്പിക്കുകയാണെന്ന് വരുത്തിത്തീര്ക്കാനാണ് ശ്രമം. ഈ തിരക്കഥ ആരാണ് സൃഷ്ടിക്കുന്നത്? ശോഭാ സുരേന്ദ്രന് സംസ്ഥാന പ്രസിഡന്റാവാന് എന്താണ് അയോഗ്യത. നൂലില് കെട്ടി ഇറങ്ങി വന്നയാളല്ല ഞാന്. ഗൗരിയമ്മയ്ക്കും അജിതയ്ക്കും ശേഷം ഏറ്റവും ബ്രൂട്ടലായ ലാത്തി ചാര്ജ് ഏറ്റുവാങ്ങിയ ഓപ്പറേഷനുവരെ വിധേയമാക്കപ്പെട്ട സ്ത്രീയാണ്. എന്താണ് എന്റെ അയോഗ്യത’, ശോഭ ചോദിച്ചു.
‘സതീശനെക്കൊണ്ട് സംസ്ഥാന നേതൃത്വത്തിനെതിരെ പറയിപ്പിച്ച് എനിക്ക് സംസ്ഥാന പ്രസിഡന്റാവാന് ആരാണ് സതീശന്. കൈയില് രാഖി കെട്ടി ഞാന് ആര്.എസ്.എസ്. ആണെന്ന് സതീശന് പറയുന്നു. ഇതാണോ ആര്എസ്എസിന്റെ പണി. ആര്എസ്എസ് പ്രവര്ത്തകനാണെങ്കില്, ഇത്തരത്തില് എന്തെങ്കിലും സംഭവം ശ്രദ്ധയില്പ്പെട്ടാല് സതീശന് പോകേണ്ടത് ആര്.എസ്.എസിന്റെ സംസ്ഥാന കാര്യാലയത്തിലേക്കാണ്. ഈ ഉപകരണത്തെ ഉപയോഗിച്ച് ചുളുവില് ശോഭാ സുരേന്ദ്രനെ കേരള രാഷ്ട്രീയത്തില് ഇല്ലായ്മ ചെയ്യാന് കഴിയുമോയെന്ന് ഗവേഷണം നടത്തുകയാണ്’, അവര് ആരോപിച്ചു.
സതീശനെ വിലയ്ക്കുവാങ്ങിയത് ആരാണെന്നും സതീശന് ആരുമായിട്ടാണ് ബന്ധമെന്നും കേരള പൊതുസമൂഹത്തിന് മുന്നില് സതീശനെക്കൊണ്ട് പറയിപ്പിക്കും. സതീശന് കേരളം വിട്ട് എവിടെയാണ് യാത്രചെയ്തത്. നാലുമാസം എവിടെയായിരുന്നു സതീശന്. തന്റെ ചെലവില് പ്രസ്ഥാനത്തെ തകര്ക്കാന് സതീശനല്ല, മുത്തുപ്പട്ടരായാലും അനുവദിക്കില്ല. സതീശന് വെറും നാവാണ്. സതീശന് മറുപടിയില്ലെന്നും അവര് വ്യക്തമാക്കി.
തന്റെ യുദ്ധം മുഖ്യമന്ത്രിക്കെതിരെയും ഇ പി ജയരാജനെതിരെയുമാണെന്നും അവർ കൂട്ടിച്ചേർത്തു. ദല്ലാൾ നന്ദകുമാറിന്റെ വീട്ടിലും ദല്ഹിയിലും രാമനിലയത്തിലും ഇ.പി ജയരാജനെ കണ്ടു. ജയരാജനും താനും തന്റെ മുറിയിൽവെച്ച് കൂടിക്കാഴ്ച നടത്തി. ദൽഹി ലളിത് ഹോട്ടലിലാണ് ജയരാജനുമായി കൂടിക്കാഴ്ച നടത്തിയത്. ഇത്ര നിലവാരം കുറഞ്ഞ ആളാണെങ്കിൽ തന്നെ കാണാൻ എന്തിന് ജയരാജൻ വന്നുവെന്ന് ചോദിച്ച ശോഭ ഇപിയുടെയും തൻറെയും ഫോൺ പരിശോധിച്ചാൽ ഇക്കാര്യം വ്യക്തമാകുമെന്നും പറഞ്ഞു. എകെജി സെന്ററിനുള്ള മറുപടിയാണ് ഈ പത്രസമ്മേളനമെന്നും അവർ പറഞ്ഞു.
