കോഴിക്കോട്: ഉള്ളിയേരിയില് ബസ്സിടിച്ച് ബൈക്ക് യാത്രികന് ദാരുണാന്ത്യം. മലപ്പുറം മുന്നിയൂര് സ്വദേശി രതീപ് നായര് ആണ് മരിച്ചത്. അമിത വേഗതയില് തെറ്റായ ദിശയിലെത്തിയ ബസ്സാണ് അപകടത്തിന് കാരണമെന്ന് പ്രദേശവാസികള് പറഞ്ഞു.
ഉള്ളിയേരി കൂമുള്ളിയില് മില്മ സൊസൈറ്റിക്ക് സമീപം ഇന്നലെ വൈകീട്ട് മൂന്ന് മണിയോടെയാണ് അപകടം നടന്നത്. രതീപ് സഞ്ചരിച്ച ബൈക്കിലേക്ക് അമിത വേഗത്തിലെത്തിയ ബസ് തട്ടുകയായിരുന്നു. കുറ്റ്യാടി – കോഴിക്കോട് റൂട്ടില് സര്വീസ് നടത്തുന്ന ഒമേഗ ബസ്സാണ് അപകടമുണ്ടാക്കിയത്. ബസ്സിന്റെ വലതു വശം തട്ടി രതീപ് തെറിച്ചു വീഴുകയായിരുന്നു എന്നാണ് വിവരം. റോഡില് വീണ രതീഷിന്റെ കാലിന് മുകളിലൂടെ ബസ് കയറിയിറങ്ങി.
ഉടന് തന്നെ നാട്ടുകാര് ചേര്ന്ന് യുവാവിനെ മൊടക്കല്ലൂരിലെ സ്വകാര്യ മെഡിക്കല് കോളേജ് ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല. ഈ റൂട്ടില് ബസുകളുടെ അമിത വേഗത യാത്രക്കാരുടെ ജീവനെടുക്കുന്നത് തുടര്ക്കഥയാവുകയാണെന്ന് നാട്ടുകാര് പറയുന്നു.
