ഇടുക്കി: ആശുപത്രിയില് ബഹളം വെച്ചത് അറിഞ്ഞെത്തിയ പൊലീസുകാരെ മര്ദ്ദിച്ച കേസില് നാല് യുവാക്കള് അറസ്റ്റില്. ഓട്ടോറിക്ഷയില് നിന്നും തെറിച്ചു വീണ യുവാവിനെ ചികിത്സിപ്പിക്കാന് തൊടുപുഴ ജില്ലാ ആശുപത്രിയില് എത്തിയ സമയമായിരുന്നു സംഭവം. തൊടുപുഴ പഞ്ചവടിപ്പാലം പാറയില് വീട്ടില് അഭിജിത്ത് (24), വാഴക്കുളം ആവോലി ചെമ്പിക്കര വീട്ടില് അമല് (19), പാലക്കുഴ മാറിക പുത്തന്പുരയില് അഭിജിത്ത് (24), സഹോദരന് അജിത്ത് (19) എന്നിവരാണ് പിടിയിലാണ്. തൊടുപുഴ പൊലീസ് കണ്ട്രോള് റൂമിലെ സിവില് പൊലീസ് ഉദ്യോഗസ്ഥന് ഷാജിത്തിനെയാണ് യുവാക്കള് ആക്രമിച്ചത്. ഇദ്ദേഹത്തിന്റെ മുഖത്തും കൈയ്ക്കും പരിക്കേറ്റിട്ടുണ്ട്. സി.പി.ഒ. ജില്ലാ ആശുപത്രിയില് ചികിത്സയിലാണ്.
സംഭവത്തെ കുറിച്ച് പൊലീസ് പറയുന്നത് ഇങ്ങനെ-ഞായറാഴ്ച വൈകീട്ട് തൊടുപുഴ ജില്ലാ ആശുപത്രിയിലാണ് സംഭവം. ഓട്ടോയില് നിന്ന് തെറിച്ച് വീണ അമലുമായാണ് യുവാക്കള് ആശുപത്രിയിലെത്തിയത്. മദ്യലഹരിയിലായിരുന്ന ഇവര് ഡോക്ടറുമാരും ജീവനക്കാരുമായി വഴക്കുണ്ടാക്കുകയും അസഭ്യം പറയുകയും ചെയ്തു. എയ്ഡ് പോസ്റ്റിലുണ്ടായിരുന്ന പൊലീസ് ഉദ്യോഗസ്ഥന് ബഹളം കേട്ടെത്തി. ഉദ്യോഗസ്ഥനോടും ഇവര് മോശമായി പെരുമാറി. തുടര്ന്ന് കണ്ട്രോള് റൂമില് നിന്ന് പൊലീസുകാര് എത്തിയപ്പോള് യുവാക്കള് അക്രമാസക്തരാകുകയായിരുന്നു. കൂടുതല് പൊലീസ് എത്തിയാണ് ഇവരെ കീഴ്പ്പെടുത്തിയത്. ആശുപത്രിയുടെ പ്രവര്ത്തനം തടസ്സപ്പെടുത്തിയതിനും പൊലീസ് ഉദ്യോഗസ്ഥരെ കൈയ്യേറ്റം ചെയ്തതിനും ഇവര്ക്കെതിരെ കേസ് എടുത്തിട്ടുണ്ട്.
