പാലക്കാട്: വിമത ശല്യം കൊണ്ട് വലയുകയാണ് കോണ്‍ഗ്രസ്. ഡോ സരിന്‍ കോണ്‍ഗ്രസ് വിട്ട് ഇടത് സ്ഥാനാര്‍ത്ഥിയായതിന്റെ ഞെട്ടല്‍ മാറാത്ത പാര്‍ട്ടിക്ക് മറ്റൊരു ആഘാതമേല്‍പ്പിച്ച് കൊണ്ടാണ് പാലക്കാട് ഉപതെരഞ്ഞെടുപ്പില്‍ സ്വതന്ത്രനായി മത്സരിക്കുമെന്ന് യൂത്ത് കോണ്‍ഗ്രസ് മുന്‍ സംസ്ഥാന ജനറല്‍ സെക്രട്ടറി എ.കെ.ഷാനിബ് പ്രഖ്യാപിച്ചത്.പാലക്കാട് ബിജെപിയെ വിജയിപ്പിക്കാന്‍ പ്രതിപക്ഷ നേതാവ് വി ഡി സതീശന് സാഹചര്യം ഒരുക്കുകയാണെന്നും വിമര്‍ശനമുണ്ട്.
മറ്റന്നാള്‍ പത്രിക നല്‍കുമെന്ന് പറഞ്ഞ ഷാനിബ് പാര്‍ട്ടിയിലെ കുറെ പുഴുക്കള്‍ക്കും പ്രാണികള്‍ക്കും വേണ്ടിയാണ് തന്റെ പോരാട്ടമെന്ന് അറിയിച്ചു. തന്റെ സ്ഥാനാര്‍ത്ഥിത്വം ബിജെപിക്ക് ഗുണമാവില്ലെന്നും ഷാനിബ് പറഞ്ഞു.
ഉപതെരെഞ്ഞടുപ്പ് സ്‌പെഷ്യലിസ്റ്റ് വി ഡി സതീശന്റെ തന്ത്രങ്ങള്‍ പാലക്കാട് പാളുമെന്ന് ഷാനിബ് പ്രതികരിച്ചു.
മുഖ്യമന്ത്രി സ്ഥാനം ലക്ഷ്യമിട്ട് വി ഡി സതീശന് എല്ലാവരെയും ചവിട്ടിമെതിക്കുകയാണ്. സതീശന് ധാര്‍ഷ്ട്യമാണ്. പാര്‍ട്ടി പ്രവര്‍ത്തകരുടെ വാക്ക് കേള്‍ക്കാന്‍ തയാറാവുന്നില്ല. അധികാരത്തിനു വേണ്ടി സതീശന് എന്തും ചെയ്യുമെന്നും ഷാനിബ് കൂട്ടിച്ചേര്‍ത്തു.
