ഗുരുവായൂര്‍: ഗുരുവായൂര്‍ ശ്രീകൃഷ്ണസ്വാമി ക്ഷേത്രത്തില്‍ എല്ലാ ദിവസവും വെര്‍ച്വല്‍ ക്യൂ ഏര്‍പ്പെടുത്താന്‍ ദേവസ്വം ഭരണസമിതി തീരുമാനിച്ചു. തീരുമാനം നവംബര്‍ 1 ന് പ്രാബല്യത്തില്‍ വരും. 25 രൂപ ബുക്കിംഗ് ഫീസ് ഈടാക്കും. നിലവില്‍ മൂന്ന് ദിവസം മാത്രമാണ് വെര്‍ച്വല്‍ ക്യൂ വഴി ദര്‍ശന സൗകര്യമുള്ളത്.
പൊതു അവധി ദിനങ്ങള്‍ ഉള്‍പ്പെടെയുള്ള സാധാരണ ദിവസങ്ങളില്‍ രാവിലെ 7 മുതല്‍ ഉച്ചയ്‌ക്ക് 1 വരെ 6 സ്ലോട്ടുകളായും വൈകീട്ട് 2 സ്ലോട്ടുകളായും തിരിച്ചിട്ടുണ്ട്. 8 സ്ലോട്ടുകളിലായി 2400 പേര്‍ക്ക് ദര്‍ശനം ലഭിക്കും. ഉദയാസ്തമന പൂജയുള്ള ദിവസങ്ങളില്‍ വൈകുന്നേരം മാത്രമേ വെര്‍ച്വല്‍ ക്യൂ ദര്‍ശനം ഉണ്ടാകൂ. ആ ദിവസങ്ങളില്‍ വൈകീട്ട് 4നും 5നുമുള്ള രണ്ട് സ്ലോട്ടുകളിലായി 600 പേര്‍ക്ക് ദര്‍ശനം നടത്താം. ആറു പേര്‍ക്കുവരെ ഒന്നിച്ചു ബുക്കുചെയ്യാം. ഓരോ മാസവും 25ാം തീയതി മുതല്‍ അടുത്ത മാസത്തേക്കുള്ള ബുക്കിങ് ആരംഭിക്കും.
നിര്‍മ്മാല്യ ദര്‍ശനവും ഓഡിറ്റോറിയം ബുക്കിംഗും ഓണ്‍ലൈന്‍ സംവിധാനത്തിലേക്ക് മാറ്റുന്നതും ആലോചിക്കുന്നുണ്ട്. ബുക്കു ചെയ്ത ശേഷം എത്താതിരിക്കുകയും മറ്റ് ഭക്തരുടെ അവസരം നഷ്ടമാവുകയും ചെയ്യുന്നത് ഒഴിവാക്കാനാണ് 25 രൂപ ഫീസ് നിശ്ചയിച്ചതെന്ന് ദേവസ്വം ചെയര്‍മാന്‍ എ.വി. ഗോപിനാഥും അഡ്മിനിസ്‌ട്രേറ്റര്‍ എസ്. ഹരിഗോപാലും പറഞ്ഞു.
