മുംബൈ: ബംഗ്ലാദേശിലെ കലാപമാണ് ഞങ്ങള്‍ക്ക് വഴികാട്ടിയെന്ന് പ്രസ്താവിച്ച നേഹ ബോറയെയും അല്‍ബേനിയയില്‍ സുപ്രീംകോടതി കത്തിക്കുന്നതിന്റെ ചിത്രം പങ്കുവെച്ച് ഇത് ഇന്ത്യയ്‌ക്കുള്ള താക്കീതാണെന്ന് പറഞ്ഞ ശിവസേന നേതാവ് സഞ്ജയ് റാവത്തിനെയും തള്ളി ഉദ്ധവ് വിഭാഗം ശിവസേന നേതാവ് പ്രിയങ്ക ചതുര്‍വേദി. ഉദ്ധവ് വിഭാഗം സിജെപിയ്‌ക്കും ഇന്ത്യാമുന്നണിയ്‌ക്കും ഒപ്പമാണെങ്കിലും അതിരുകടന്ന രാജ്യദ്രോഹനിലപാടുകള്‍ക്കൊപ്പമില്ലെന്ന സന്ദേശമാണ് പ്രിയങ്ക ചതുര്‍വേദി നല്‍കിയത്.
അൽബേനിയയിൽ സർക്കാരിനെതിരെ വിദ്യാർത്ഥികളുടെ നേതൃത്വത്തിൽ നടക്കുന്ന അക്രമാസക്തമായ പ്രതിഷേധങ്ങളെക്കുറിച്ച് പങ്കുവെച്ച ട്വീറ്റില്‍ അൽബേനിയയിലെ സുപ്രീം കോടതി കെട്ടിടം കത്തുന്നതായി അവകാശപ്പെടുന്ന ഒരു വീഡിയോയും സഞ്ജയ് റാവത്ത് പങ്കുവെച്ചിരുന്നു. അഴിമതിക്കാരനായ ഒരു പ്രധാനമന്ത്രിയെ നീതിന്യായ വ്യവസ്ഥ പിന്തുണച്ചതാണ് പൗരന്മാരെ പ്രകോപിപ്പിച്ചതെന്നായിരുന്നു ഈ ട്വീറ്റിനൊപ്പമുള്ള സഞ്ജയ് റാവത്തിന്റെ പ്രതികരണം. “ഇത്തരം സംഭവങ്ങളിൽ നിന്ന് എല്ലാ രാജ്യങ്ങളും, പ്രത്യേകിച്ച് ഇന്ത്യയും, ഒരു പാഠം ഉൾക്കൊള്ളണം” എന്നും സഞ്ജയ് റാവത്ത് പറഞ്ഞിരുന്നു.
അങ്ങേയറ്റം രാജ്യദ്രോഹപരമായ ഈ പ്രസ്താവനയെ തള്ളി ശിവസേന ഉദ്ധവ് വിഭാഗം നേതാവ് പ്രിയങ്ക ചതുര്‍വേദി ഉടന്‍ രംഗത്തെത്തി. സുപ്രീം കോടതിയായാലും പാർലമെന്റായാലും ഭരണഘടനാപരമായ സ്ഥാപനങ്ങളെ അസ്ഥിരപ്പെടുത്തുക എന്നത് ഒട്ടും അംഗീകരിക്കാനാവാത്ത കാര്യമാണെന്ന് പ്രിയങ്ക ചതുര്‍വേദി പറഞ്ഞു. “ഇന്ത്യയ്‌ക്ക് മറ്റൊരു രാജ്യത്തുനിന്നും ഒന്നും പഠിക്കേണ്ടതില്ല… കമ്മ്യൂണിസ്റ്റ് ഏകാധിപത്യത്തിന് കീഴിൽ വർഷങ്ങളോളം ദുരിതമനുഭവിച്ച ഒരു ചെറിയ രാജ്യമാണ് അൽബേനിയ. ജനങ്ങൾ നിയമം കൈയിലെടുക്കുക, ക്രമസമാധാനം തകർക്കുക, സുപ്രീം കോടതിയായാലും പാർലമെന്റായാലും ഭരണഘടനാപരമായ സ്ഥാപനങ്ങളെ അസ്ഥിരപ്പെടുത്തുക എന്നത് ഒട്ടും അംഗീകരിക്കാനാവാത്ത കാര്യമാണ്. “- പ്രിയങ്ക ചുതര്‍വേദി വാര്‍ത്താ ഏജന്‍സിയായ എഎന്‍ഐയോട് പറഞ്ഞു.
പിന്നീട് നേഹ ബോറയുടെ പ്രസ്താവനയെയും പ്രിയങ്ക ചതുര്‍വേദി തള്ളി. “ബംഗ്ലാദേശിലെ പ്രക്ഷോഭങ്ങളിൽ നിന്ന് പ്രചോദനം ഉൾക്കൊണ്ട് ഇവിടെയും ഭരണമാറ്റം കൊണ്ടുവരണമെന്ന് നിർദ്ദേശിക്കുന്നവരോട് ഒന്നു പറയാനുണ്ട് – ഇത് അങ്ങേയറ്റം ഖേദകരമാണ്. കാരണം, ബംഗ്ലാദേശില്‍ നടന്ന പ്രക്ഷോഭങ്ങൾ വിദ്യാർത്ഥികൾ മാത്രമായിരുന്നില്ല നയിച്ചത്; പിന്നീട് അതിൽ ഒരു ഇസ്‌ലാമിസ്റ്റ് പ്രസ്ഥാനം കടന്നുവരികയും, അതിന്റെ ഫലമായി ഹിന്ദുക്കൾ ഉൾപ്പെടെയുള്ള ന്യൂനപക്ഷങ്ങൾ ആക്രമിക്കപ്പെടുകയും ചെയ്തു. ഇത്തരത്തിലുള്ള അക്രമാസക്തമായ ഭരണമാറ്റത്തിന് ഒരു ജനാധിപത്യ വ്യവസ്ഥയിലും സ്ഥാനമില്ല. അതിനാൽ, അൽബേനിയയോ പാരീസോ അല്ലെങ്കിൽ ഇതുപോലുള്ള മറ്റ് ഉദാഹരണങ്ങളോ നമുക്ക് മാതൃകയാക്കാൻ പാടില്ല…”- പ്രിയങ്ക ചതുര്‍വേദി പറഞ്ഞു.
