കൊച്ചി: റോഡിലെ കുഴിയില്‍ വീണുള്ള മരണങ്ങളിലൊന്നും അധികൃതര്‍ക്ക് ആശങ്കയില്ലെന്ന് ഹൈക്കോടതി. ഇതെല്ലാം കണക്കുകളുടെ ഭാഗമായി മാത്രമാണ് അധികൃതര്‍ കാണുന്നത്. കൊടുങ്ങല്ലൂരില്‍ റോഡിലെ വെള്ളം നിറഞ്ഞ കുഴിയില്‍ വീണ് ബൈക്ക് യാത്രക്കാരന്‍ മരിച്ച സംഭവത്തിലാണ് ജസ്റ്റിസ് ദേവന്‍ രാമചന്ദ്രന്‍ ഇത്തരമൊരു വിമര്‍ശനം നടത്തിയത് . സംഭവത്തില്‍ കോടതി അധികൃതരില്‍ നിന്ന് വിശദീകരണം തേടി. അഴീക്കോട് സ്വദേശി നിഖില്‍ ആന്റണി(24) ആണ് രാത്രി കുഴിയില്‍ വീണ് മരിച്ചത്. റോഡിലെ കുഴിയില്‍ ജനങ്ങള്‍ വീഴുന്ന സംഭവം മറ്റെവിടെയെങ്കിലും ഉണ്ടോ എന്ന് കോടതി ചോദിച്ചു. കളക്ടറും മറ്റ് അധികാരികളും ഇക്കാര്യങ്ങളൊന്നും പരിഗണിക്കുന്നില്ല. എല്ലാറ്റിനും ന്യായീകരണം പറയും. എന്നാല്‍ ഹൈക്കോടതിയുടെ ശക്തമായ ഇടപെടല്‍ ഉണ്ടാകുമെന്നും ജസ്റ്റിസ് ദേവന്‍ രാമചന്ദ്രന്‍ വ്യക്തമാക്കി.
