ന്യൂദൽഹി : 2024ലെ ലോക്‌സഭാ തിരഞ്ഞെടുപ്പിനെത്തുടർന്ന് പ്രധാനമന്ത്രി നരേന്ദ്ര മോദിയുടെ പ്രതിമാസ റേഡിയോ സംപ്രേക്ഷണം ‘മൻ കി ബാത്ത്’ മൂന്ന് മാസത്തെ ഇടവേളയ്‌ക്ക് ശേഷം ഞായറാഴ്ച പുനരാരംഭിച്ചു. പ്രധാന വിഷയങ്ങളിൽ പ്രധാനമന്ത്രിക്ക് ജനങ്ങളുമായി സംവദിക്കാനുള്ള വേദിയായ ‘മൻ കി ബാത്തിന്റെ’ ഇന്നത്തെ എപ്പിസോഡ്, മൂന്നാം തവണയും വീണ്ടും തിരഞ്ഞെടുക്കപ്പെട്ടതിന് ശേഷമുള്ള ആദ്യത്തെ മൻ കീ ബാത്താണിത്.
ദേശീയ ജനാധിപത്യ സഖ്യത്തെ (എൻഡിഎ) വീണ്ടും അധികാരത്തിലെത്തിച്ചതിന് വോട്ടർമാർക്ക് പ്രധാനമന്ത്രി മോദി നന്ദി പറഞ്ഞു. ഭരണഘടനയിലും ജനാധിപത്യ പ്രക്രിയയിലും ജനങ്ങൾ തങ്ങൾക്കുള്ള അഭേദ്യമായ വിശ്വാസം തിരഞ്ഞെടുപ്പിൽ പുനഃസ്ഥാപിച്ചതായി അദ്ദേഹം പറഞ്ഞു.
“നമ്മുടെ ഭരണഘടനയിലും രാജ്യത്തിന്റെ ജനാധിപത്യ സംവിധാനത്തിലും ഉള്ള അചഞ്ചലമായ വിശ്വാസം അവർ ആവർത്തിച്ചതിന് ഇന്ന് ഞാൻ രാജ്യക്കാർക്ക് നന്ദി പറയുന്നു. 2024 ലെ ലോക്‌സഭാ തിരഞ്ഞെടുപ്പ് ലോകത്തിലെ ഏറ്റവും വലിയ തിരഞ്ഞെടുപ്പായിരുന്നു. ഇത്രയും വലിയ തിരഞ്ഞെടുപ്പ് ഒരു രാജ്യത്തും നടന്നിട്ടില്ല. 65 കോടി ജനങ്ങൾ വോട്ട് രേഖപ്പെടുത്തി,” പ്രധാനമന്ത്രി പറഞ്ഞു.
അന്താരാഷ്‌ട്ര യോഗാ ദിനാചരണം, ആഗോളതലത്തിൽ ഇന്ത്യൻ സിനിമകൾ മികവ് പുലർത്തുന്നതിനെക്കുറിച്ചും വനവൽക്കരണത്തിലെ നേട്ടങ്ങളെക്കുറിച്ചും അദ്ദേഹം സ്പർശിച്ചു.
2014 ഒക്‌ടോബറിൽ ആരംഭിച്ച ‘മൻ കി ബാത്ത്’, സർക്കാർ സംരംഭങ്ങൾ, ദേശീയ പ്രശ്‌നങ്ങൾ, ജനങ്ങൾക്ക് പ്രചോദനം നൽകുന്ന സന്ദേശങ്ങൾ തുടങ്ങി വിവിധ വിഷയങ്ങൾ ചർച്ച ചെയ്ത് രാഷ്‌ട്രവുമായി നേരിട്ട് ബന്ധപ്പെടാൻ പ്രധാനമന്ത്രിയെ അനുവദിക്കുന്നു.
22 ഇന്ത്യൻ ഭാഷകളിലും 29 ഉപഭാഷകളിലും ഫ്രഞ്ച്, ചൈനീസ്, അറബിക് ഉൾപ്പെടെ 11 വിദേശ ഭാഷകളിലും ഇത് പ്രക്ഷേപണം ചെയ്യുന്നു, ആകാശവാണിയുടെ 500-ലധികം പ്രക്ഷേപണ കേന്ദ്രങ്ങളിലൂടെ വിശാലമായ പ്രേക്ഷകരിലേക്ക് എത്തിച്ചേരുന്നു.
