തിരുവനന്തപുരം: കേരളത്തില്‍ നിന്ന് ലോക്‌സഭയിലെത്തിയ ആദ്യ അംഗം സുരേഷ് ഗോപി കേന്ദ്രമന്ത്രിയായി സത്യ പ്രതിജ്ഞ ചെയ്തപ്പോള്‍ തിരുവനന്തപുരത്തെ ബി ജെ പി ആസ്ഥാനത്തും ആഹ്ലാദം. പടക്കം പൊട്ടിച്ചും മധുരം വിതരണം ചെയ്തുമാണ് പ്രവര്‍ത്തകര്‍ ആഘോഷിച്ചത്. ഉച്ചത്തില്‍ മുദ്രാവാക്യങ്ങളും മുഴങ്ങി.
ദൈവനാമത്തിലാണ് സുരേഷ് ഗോപി സത്യപ്രതിജഞ ചെയ്തത്.മുണ്ടും ഷര്‍ട്ടും ധരിച്ച് കേരളീയ വേഷത്തിലെത്തിയ സുരേഷ് ഗോപി സഹമന്ത്രിയായാണ് മൂന്നാം മോദി സര്‍ക്കാരില്‍ അംഗമായത്. സുരേഷ് ഗോപിയോട് ഞായറാഴ്ച ആണ് ദല്‍ഹിയിലെത്താന്‍ പ്രധാനമന്ത്രി ആവശ്യപ്പെട്ടത്. തുടര്‍ന്ന് ഉച്ചയ്‌ക്ക് 12. 10 നുളള വിമാനത്തില്‍ അദ്ദേഹം ദല്‍ഹിയിലെത്തുകയായിരുന്നു.
തൃശൂരില്‍ നിന്ന് 75000 ത്തോളം വോട്ടുകളുടെ ഭൂരിപക്ഷം നേടിയാണ് സുരേഷ് ഗോപി ലോക്‌സഭയിലെത്തിയത്. ഇടതു വലതു മുന്നണികളുടെ കുപ്രചരണങ്ങളെയും അധിക്ഷേപങ്ങളെയും ജനപിന്തുണയാല്‍ അതിജീവിച്ചാണ് സുരേഷ് ഗോപിയുടെ വിജയം.
സത്യപ്രതിജ്ഞാ വേളയില്‍ തൃശൂരിലും ബി ജെ പി പ്രവര്‍ത്തകര്‍ ആഹ്ലാദ പ്രകടനവും മുദ്രാവാക്യം വിളികളും നടത്തി.
