ന്യൂഡല്ഹി: കോണ്ഗ്രസ് കടുത്ത പ്രതിസന്ധി നേരിടുകയാണെന്നും തിരഞ്ഞെടുപ്പിനു പണം മുടക്കാന് തന്റെ കൈയില് ഇല്ലാത്തതിനാലാണ് സ്ഥാനാര്ത്ഥിത്വത്തില് നിന്ന് പിന്മാറിയതെന്നും പുരിയില് നിന്ന് സ്ഥാനാര്ത്ഥിത്വം പിന്വലിച്ച കോണ്ഗ്രസിലെ സുചരിത മൊഹന്തി ഒരു മാധ്യമത്തില് നല്കിയ കൂടിക്കാഴ്ചയില് പറഞ്ഞു. സ്ഥാനാര്ത്ഥിയായതിനുശേഷമാണ് തെരഞ്ഞെടുപ്പ് ചെലവിലുള്ള പണം മുഴുവന് സ്വന്തം നിലയ്ക്ക് കണ്ടെത്തണമെന്ന് പാര്ട്ടി അറിയിച്ചത്. മറ്റൊരു സ്ഥാനാര്ത്ഥിയോടും ഇങ്ങനെ പറഞ്ഞതായി അറിവില്ല. ഇതാണ് പിന്മാറാന് കാരണം .ഒരു നിയമസഭാ മണ്ഡലത്തിലെ സ്ഥാനാര്ത്ഥിയെ സംബന്ധിച്ചും തനിക്ക് അഭിപ്രായവ്യത്യാസമുണ്ടായിരുന്നു. ഇത് പാര്ട്ടിയോട് വ്യക്തമാക്കുകയും ചെയ്തു.പ്രചാരണത്തിന് പണം സമാഹരിക്കാന് ശ്രമിച്ചെങ്കിലും കഴിഞ്ഞില്ല. വളരെ കുറച്ചു തുക മാത്രമാണ് ലഭിച്ചത്. കൂടുതല് സാമ്പത്തികശേഷിയുള്ളവര് മാത്രം കോണ്ഗ്രസില് സ്ഥാനാര്ത്ഥിയാകട്ടെ എന്ന് താന് തീരുമാനിക്കുകയായിരുന്നു സുചരിത പറയുന്നു.
