സാത്വിക്-ചിരാഗ് സഖ്യം സെമിയില്‍

പാരിസ്: ഫ്രഞ്ച് ഓപ്പണ്‍ ബാഡ്മിന്റണ്‍ പുരുഷ ഡബിള്‍സില്‍ ഭാരത സഖ്യം സാത്വിക് സായിരാജ് രങ്കിറെഡ്ഡിയും ചിരാഗ് ഷെട്ടിയും സെമിയില്‍ കടന്നു. തായ്‌ലന്‍ഡ് ജോഡികളെയാണ് ഇരുവരും ചേര്‍ന്ന് ക്വാര്‍ട്ടറില്‍ പരാജയപ്പെടുത്തിയത്. നേരിട്ടുള്ള ഗെയിമിന്റെ തകര്‍പ്പന്‍ ജയമാണ് സ്വന്തമാക്കിയത്. സ്‌കോര്‍: 21-19, 21-13

വനിതാ സിംഗിള്‍സില്‍ ഭാരതത്തിന്റെ പി.വി. സിന്ധു ക്വാര്‍ട്ടറില്‍ പൊരുതി തോറ്റു. ചൈനയുടെ ഷെന്‍ യുഫേയുമായി നടന്ന മത്സരത്തില്‍ മികച്ച പോരാട്ടം കാഴ്‌ച്ചവച്ചാണ് ഭാരത താരം കീഴടങ്ങിയത്. ഇഞ്ചോടിഞ്ച് പോരാട്ടത്തിലേക്ക് നീണ്ട ആദ്യ ഗെയിം പിടിച്ചെടുത്ത സിന്ധു പിന്നീടത്തെ രണ്ട് ഗെയിമിലും മികച്ച രീതിയില്‍ പൊരുതിയെങ്കിലും പരാജയപ്പെടുകയായിരുന്നു. സ്‌കോര്‍: 24-22, 17-21, 18-21

വെള്ളിയാഴ്ച പുലര്‍ച്ചെ വരെ നീണ്ട പുരുഷ സിംഗിള്‍സ് പോരാട്ടത്തില്‍ ഭാരത താരം ലക്ഷ്യ സെന്‍ ക്വാര്‍ട്ടറില്‍ പ്രവേശിച്ചിരുന്നു. ലി ഷിഫെങ് ആണ് ലക്ഷ്യയോട് പരാജയപ്പെട്ടത്.