മാഡ്രിഡ്: ചാമ്പ്യന്സ് ലീഗിലെ മറ്റൊരു വീറും വാശിയുമുള്ള പോരാട്ടം ഇന്ന്. രണ്ടാം സെമിയില് ഇംഗ്ലീഷ് വമ്പന്മാരായ ആഴ്സണല് എവേ മത്സരത്തില് സ്പാനിഷ് കരുത്ത് അത്ലറ്റിക്കോ മാഡ്രിഡിനെ നേരിടും. കഴിഞ്ഞ വര്ഷം ചാമ്പ്യന്സ് ലീഗില് ആഴ്സണലില്നിന്നേറ്റ 4-0ന്റെ വമ്പന് പരാജയത്തിന് പ്രതികാരം ചെയ്യാനുള്ള അവസരം കൂടിയാണ് അത്ലറ്റിക്കോയ്ക്ക് കൈവന്നിരിക്കുന്നത്. 2018ലാണ് അത്ലറ്റിക്കോ അവസാനമായി ആഴ്സണലിനെ പരാജയപ്പെടുത്തുന്നത്. അതേസമയം, കണക്കുകളുടെ കളി നോക്കിയാല് ഈ സീസണില് അത്ലറ്റിക്കോ മാഡ്രിഡാണ് മുന്നില് 34 ഗോളുകള് അത്ലറ്റിക്കോ നേടിയപ്പോള് 27 ഗോളുകളാണ് ഈ സീസണില് ആഴ്സണലിന്റെ സംഭാവന.
മികച്ച ഫോമിലാണ് ആഴ്സണലുള്ളത്. ഇംഗ്ലീഷ് പ്രീമിയര് ലീഗ് പോയിന്റ് നിലയില് മുന്നിലുള്ള ആഴ്സണല് ന്യൂകാസില് യുണൈറ്റഡിനെ പരാജയപ്പെടുത്തിയതിന്റെ ആത്മവിശ്വാസത്തിലാണ് മാഡ്രിഡിലെത്തിയിരിക്കുന്നത്. ഇത് തുടര്ച്ചയായ രണ്ടാം തവണയാണ് ആഴ്സണല് ചാമ്പ്യന്സ് ലീഗിന്റെ സെമിയിലെത്തുന്നത്. ആദ്യപാദത്തില് മികച്ച വിജയം നേടി രണ്ടാം പാദത്തില് സ്വന്തം തട്ടകത്തിലിറങ്ങാനുള്ള ശ്രമമാണ് ആഴ്സണലിന്റേത്. സെമി കടന്നാല് 20 വര്ഷങ്ങള്ക്കു ശേഷം ആഴ്സണലിന് ചാമ്പ്യന്സ് ലീഗ് ഫൈനലില് കളിക്കാം. അവസാന രണ്ട് റൗണ്ടുകളില് ബയര് ലെവര്കുസനെയും സ്പോര്ട്ടിങ്ങിനെയും മറികടന്നാണ് സെമി ബെര്ത്ത് ഉറപ്പിച്ചിരിക്കുന്നത്.
അതേസമയം, രാജകീയമായാണ് അത്ലറ്റിക്കോ മാഡ്രിഡ് സെമിയിലെത്തിയിരിക്കുന്നത്. പരമ്പരാഗത വൈരികളായ ബാഴ്സലോണയെ കെട്ടുകെട്ടിച്ചാണ് അവര് സെമിയിലെത്തിയിരിക്കുന്നത്.
ലാ ലിഗയില് കിരീടപ്പോരില്നിന്ന് ഇതിനോടകം പിന്തള്ളപ്പെട്ട അത്ലറ്റിക്കോയ്ക്ക് ഇവിടെ വിജയം അനിവാര്യമാണ്.
ഇരുടീമുകളുടെയും പ്രധാന പ്രശ്നം പരിക്കാണ്. പ്രതിരോധ താരം ഹൊസെ ഹിമിനെസും മിഡ്ഫീല്ഡര് പാബ്ലോ ബാറിയോസും അത്ലറ്റിക്കോയ്ക്കായി കളിക്കില്ല. മുന്നേറ്റനിരയിലെ കരുത്തന് അഡെമോല ലുക്ക്മാനും പരിക്കിനെത്തുടര്ന്ന് കളിക്കുന്ന കാര്യം സംശയമാണ്.
ആഴ്സണല് നിരയില് ജുറെന് ടിംബര്, കായി ഹാവെര്ട്സ്, എബെറെച്ചി എസെ, റിക്കാര്ഡോ കലാഫിയോറി എന്നിവര് കളിക്കുന്ന കാര്യത്തില് ഇന്നേ അന്തിമ തീരുമാനമാകൂ. മധ്യനിര താരം മികെല് മെറിനോ കാലിലെ പരിക്കിനെത്തുടര്ന്ന് ഇന്നു കളിക്കില്ല.
ജൂലിയന് അല്വാരസ്, അന്റോയ്ന് ഗ്രീസ് മാന് എന്നിവരുടെ മിന്നും പ്രകടനം സെമിയിലും ആവര്ത്തിച്ചാല് അത്ലറ്റിക്കോയ്ക്ക് ജയം എളുപ്പമാകും.
മിന്നും ഫഓമിലുള്ള ആഴ്സണല് അവസാനം കളിച്ച 11 ചാമ്പ്യന്സ് ലീഗ് മത്സരങ്ങളില് ഒന്നില് മാത്രമാണ് പരാജയപ്പെട്ടത്. അതിലാവട്ടെ, അവസാനം കളിച്ച ഏഴിലും വിജയിച്ചു.
