ന്യൂദല്ഹി: ലോക്സഭാ തെരഞ്ഞെടുപ്പിന് മുമ്പ് പൗരത്വ ഭേദഗതി നിയമം പ്രാബല്യത്തിലാകുമെന്ന് കേന്ദ്രആഭ്യന്തരമന്ത്രി അമിത് ഷാ. ഒരു ദേശീയ ചാനലിലെ മുഖാമുഖത്തില് സംസാരിക്കുകയായിരുന്നു അദ്ദേഹം.
സിഎഎ രാജ്യത്തിന്റെ പൊതു നിയമമാണ്. തെരഞ്ഞെടുപ്പിന് മുമ്പ് ഇത് പ്രാബല്യത്തില് വരും. ആര്ക്കും അതുതടയാനും കഴിയില്ല. വോട്ട് ബാങ്കിന്റെ അത്യാര്ത്തിയില് കോണ്ഗ്രസ് പലതും മറന്നു. ഭരണഘടനാ അസംബ്ലിയുടെ വാഗ്ദാനമായിരുന്നു സിഎഎ.
രാജ്യം വിഭജിക്കപ്പെട്ടപ്പോള്, ദശലക്ഷക്കണക്കിന് ആളുകള് പാകിസ്ഥാനില് നിന്നും ഇപ്പോഴത്തെ ബംഗ്ലാദേശില് നിന്നും ഭാരതത്തിലേക്ക് വരുന്നുണ്ടായിരുന്നു, നിങ്ങള് ക്ഷമയോടെയിരിക്കൂ, രാജ്യം നിങ്ങളെ സ്വാഗതം ചെയ്യുമെന്ന് കോണ്ഗ്രസുകാര് ഇവര്ക്ക് അന്ന് വാഗ്ദാനം നല്കിയിരുന്നു. എന്നാല് വോട്ട് ബാങ്കിന്റെ പേരില് കോണ്ഗ്രസുകാര് എല്ലാം മറന്നു. 1947 ആഗസ്ത് 15ലെ വാഗ്ദാനത്തെക്കുറിച്ച് ഭാരതം ഓര്ക്കാതിരിക്കുകയും അവര്ക്ക് പൗരത്വം നല്കാതിരിക്കുകയും ചെയ്താല് അത് വഞ്ചനയാകും. ഞങ്ങളുടെ സര്ക്കാര് അവര്ക്ക് പൗരത്വവും അവകാശങ്ങളും നല്കും. അദ്ദേഹം പറഞ്ഞു.
പൊതു സിവില് കോഡിനെ മതവുമായി ബന്ധിപ്പിക്കുന്നത് തെറ്റാണെന്നും അമിത് ഷാ പറഞ്ഞു. യുസിസി ബിജെപിയുടെ മാത്രം പ്രശ്നമല്ല രാജ്യത്തിന്റെ മുഴുവന് ആവശ്യമാണ്. പൊതു സിവില് കോഡിനെ മതവുമായി ബന്ധിപ്പിച്ചത് നി
ര്ഭാഗ്യകരമാണ്. ആര്ട്ടിക്കിള് 44-ലെ നിര്ദ്ദേശക തത്വങ്ങളില് പാര്ലമെന്റും നിയമസഭകളും ഇത് നടപ്പാക്കണമെന്ന് ഭരണഘടനാ അസംബ്ലി പറഞ്ഞിട്ടുണ്ട്. നിങ്ങള്ക്ക് ഒരു മതേതര രാജ്യം വേണമെങ്കില് മതത്തിന്റെ അടിസ്ഥാനത്തില് നിയമങ്ങള് ഉണ്ടാകരുത്. അതുകൊണ്ട് എല്ലാവര്ക്കും ഒരേ നിയമം എന്നത് പ്രധാനമാണ്.
നിയമത്തിന്റെ അടിസ്ഥാനത്തില് ഒരു രാജ്യവും മതേതരമല്ല, ഇത് തീരുമാനിക്കുന്നത് ജനങ്ങളാണ്. മതം വ്യക്തിപരമായ കാര്യമാണ്, സംസ്ഥാന വിഷയമല്ല. ആയിരക്കണക്കിന് വര്ഷങ്ങളായി നമ്മള് ഇങ്ങനെയാണ്. ഒരു ജനാധിപത്യ സംവിധാനത്തിന് ഒരു നിയമം നടപ്പിലാക്കണം.
ഭാരത് ജോഡോ എന്ന ബാനറിന് കീഴില് ഭാരതത്തെ തകര്ക്കാനുള്ള ഒരു അഭ്യാസം നടക്കുന്നുണ്ട്. കോണ്ഗ്രസ് പാര്ട്ടിക്ക് എന്താണ് സംഭവിച്ചതെന്ന് എനിക്കറിയില്ല. രാജ്യത്തെ വടക്കും തെക്കുമായി വിഭജിക്കണമെന്ന് ആ പാര്ട്ടിയിലെ ഒരു വലിയ നേതാവ് പറയുന്നു. അദ്ദേഹത്തിന്റെ കൂട്ടാളികള് സനാതന ധര്മ്മത്തിനെതിരെ വിഷം ചീറ്റുന്നു, പക്ഷേ കോണ്ഗ്രസ് അദ്ദേഹത്തെ തടയുന്നില്ല- അമിത് ഷാ ചൂണ്ടിക്കാട്ടി.
