കൊല്ലം: കരിക്കോട് കരുനെല്ലൂർ ഭഗവതി ക്ഷേത്രോത്സവത്തിനിടെ യുവാവിന് മർദ്ദനമേറ്റതായി പരാതി. ആക്രമണത്തിൽ യുവാവിന്റെ തലയോട്ടി അടിച്ചു തകർത്തുവെന്നാണ് വിവരം. തട്ടാർകോണം സ്വദേശി ശരത് കുമാറിനാണ് അതിക്രൂരമായി മർദ്ദനമേറ്റത്.
ഈ മാസം 16-നാണ് കേസിന് ആസ്പദമായ സംഭവം. ഉത്സവത്തിനിടെ അഞ്ച് പേർ ചേർന്നാണ് യുവാവിനെ ആക്രമിച്ച് തലയോട്ടി തല്ലിത്തകർത്തത്. ആക്രമണത്തിൽ ഗുരുതരമായി പരിക്കേറ്റ ശരത് കുമാർ ജില്ലാ ആശുപത്രിയിൽ ചികിത്സയിലാണ്. തടിക്കഷ്ണം കൊണ്ടാണ് മർദ്ദനമേറ്റത്. ആക്രമണത്തിൽ ശരത്തിന്റെ തോളെല്ലിനും പൊട്ടലുണ്ട്.
സംഭവത്തിന്റെ സിസിടിവി ദൃശ്യങ്ങൾ അടുത്തിടെ പുറത്തുവന്നിരുന്നു. ഉത്സവത്തിനെത്തിയ നാട്ടുകാരിൽ ഒരാളാണ് ദൃശ്യം പകർത്തിയത്. സംഭവത്തിൽ പ്രതികൾക്ക് വേണ്ടിയുള്ള അന്വേഷണം ഊർജ്ജിതമാക്കിയതായി പോലീസ് അറിയിച്ചു. ആക്രമണത്തിൽ ഉൾപ്പെട്ടവർ മുമ്പും നിരവധി കേസുകളിൽ പ്രതികളാണെന്ന് പോലീസ് പറയുന്നു.
