ഇടുക്കി: നിയന്ത്രണംവിട്ട ബൈക്ക് വൈദ്യുത പോസ്റ്റിലിടിച്ച് ഗുരുതരമായി പരിക്കേറ്റ യുവതി മരിച്ചു. മൂവാറ്റുപുഴ – ആരക്കുഴ റോഡില്‍ ആണ് സംഭവം. ഇടുക്കി പുറപ്പുഴ കുണിഞ്ഞി സ്വദേശി മേമ്പിള്ളില്‍ ഷാന്റി ബോബി (36) ആണ് മരിച്ചത്. ശനിയാഴ്ച വൈകിട്ടാണ് അപകടം നടന്നത്.
ഉച്ചതിരിഞ്ഞ് മൂന്ന് മണിയോടെ ഷാന്റിയും, ഭര്‍ത്താവ് ബോബിയും രണ്ട് വയസുള്ള ഇവരുടെ കുട്ടിയും സഞ്ചരിച്ച ബൈക്കാണ് പെരുമ്പല്ലൂരില്‍ അപകടത്തില്‍പെട്ടത്. ഇടിയുടെ ആഘാതത്തില്‍ ഷാന്റിക്ക് തലയ്‌ക്ക് ഗുരുതരമായി പരിക്കേറ്റിരുന്നു. ഇവരെ കോലഞ്ചേരിയിലെ സ്വകാര്യ ആശുപത്രിയില്‍ പ്രവേശിപ്പിച്ചിരുന്നു. ചികിത്സയിലിരിക്കെ ചൊവ്വാഴ്ച വൈകുന്നേരമാണ് മരണം.
ഷാന്റിയുടെ ഭര്‍ത്താവ് ബോബി ചികിത്സയില്‍ തുടരുകയാണ്. കുട്ടി പരിക്കില്ലാതെ രക്ഷപെട്ടു. കുട്ടിയുമായി ആശുപത്രിയില്‍ പോയി തിരികെ വരവെയാണ് അപകടമുണ്ടായത്.
