തൃശൂര്: മോദിയുടെ ഗ്യാരന്റി – പുതിയ കേരളം’ എന്ന സന്ദേശവുമായി ബിജെപി സംസ്ഥാന അധ്യക്ഷന് കെ.സുരേന്ദ്രന് നയിക്കുന്ന കേരള പദയാത്ര നാളെ തൃശൂര് ലോക്സഭാ മണ്ഡലത്തില്. പദയാത്രയുടെ ഉദ്ഘാടന പൊതുയോഗം വടക്കുന്നാഥ ക്ഷേത്ര മൈതാനിയിലെ വിദ്യാര്ത്ഥി കോര്ണറില് വൈകിട്ട് മൂന്നിന്.
സാമൂഹിക രാഷ്ട്രീയ സംസ്കാരിക രംഗത്തെ പ്രമുഖര് പങ്കെടുക്കുന്ന പദയാത്രയില് തൃശൂര് പാര്ലമെന്റ് മണ്ഡലത്തിലെ 25,000 പ്രവര്ത്തകര് കെ. സുരേന്ദ്രനൊപ്പം അണിചേരും. അമര്ജ്യോതി മണ്ഡപത്തിലെ പുഷ്പാര്ച്ചനക്ക് ശേഷം രാവിലെ 11.30ന് സാമുദായിക, മത സംഘടനാ നേതാക്കളുമായി ഹോട്ടല് എലൈറ്റ് ഇന്റര്നാഷണലില് കൂടിക്കാഴ്ചയും അവര്ക്കൊപ്പം ഉച്ചഭക്ഷണവും കഴിക്കും.
വിവിധ പാര്ട്ടികളില് നിന്നും രാജിവെച്ച 1000 പേര് കെ. സുരേന്ദ്രനില് നിന്ന് ബിജെപി അംഗത്വം സ്വീകരിച്ചു പദയാത്രയില് അംഗങ്ങളാകും. പദയാത്ര വിദ്യാര്ത്ഥി കോര്ണറില് നിന്ന് ആരംഭിച്ച് ഒല്ലൂരില് സമാപിക്കും.
