കൊച്ചി: വണ്ടിപ്പെരിയാറില് ആറ് വയസുകാരിയെ ബലാത്സംഗം ചെയ്ത് കൊലപ്പെടുത്തിയ കേസില് പുനരന്വേഷണം ആവശ്യപ്പെട്ട് പെണ്കുട്ടിയുടെ കുടുംബം ഹൈക്കോടതിയെ സമീപിച്ചു. ഐപിഎസ് ഉദ്യോഗസ്ഥന് തലവനായി പ്രത്യേക ടീമിനെ കൊണ്ട് അന്വേഷണം നടത്തണമെന്നാണ് കുടുംബത്തിന്റെ ഹര്ജിയിലെ ആവശ്യം.
കുറ്റവാളിയെ രക്ഷിക്കാന് ബോധപൂര്വ്വമായ ശ്രമങ്ങള് അന്വേഷണ സംഘത്തില് നിന്നുണ്ടായി. തെളിവുകള് ശേഖരിക്കുന്നതില് പൊലീസ് വീഴ്ചവരുത്തിയെന്നു ഹര്ജിയില് പറയുന്നു. അന്വേഷണ ഉദ്യോഗസ്ഥന് യഥാസമയം സംഭവ സ്ഥലത്ത് എത്തിയില്ല. തെളിവുകള് ശാസ്ത്രീയമായി ശേഖരിച്ച് കോടതിയില് ഹാജരാക്കിയില്ലെന്നും കുടുംബം ആരോപിച്ചു. ഡിഎന്എ തെളിവുകള് ശേഖരിക്കുന്നതിലും വീഴ്ച വരുത്തി. അന്വേഷണ സംഘത്തില് നിന്ന് ഗുരുതര വീഴ്ചകളുണ്ടായി. ഈ സാഹചര്യത്തില് കൊലപാതക കേസ് പുനരന്വേഷിക്കണമെന്നാണ് കുടുംബത്തിന്റെ ആവശ്യം. ഹര്ജി ഹൈക്കോടതി ഇന്നു പരിഗണിച്ചേക്കും.
2021 ജൂണ് 30നായിരുന്നു ആറുവയസുകാരിയെ തൂങ്ങിമരിച്ച നിലയില് കണ്ടെത്തിയത്. പോസ്റ്റ്മോര്ട്ടം റിപ്പോര്ട്ടില് പെണ്കുട്ടി പീഡനത്തിനിരയായെന്ന് കണ്ടെത്തിയിരുന്നു. തുടര്ന്നാണ് അയല്വാസിയായ അര്ജുന് സുന്ദറിനെ അറസ്റ്റ് ചെയ്തത്. എന്നാല്, കഴിഞ്ഞ ഡിസംബറില് കോടതി പ്രതിയെ കുറ്റവിമുക്തനാക്കുകയായിരുന്നു. കേസില് വിചാരണക്കോടതിയുടെ വിധിക്കെതിരെ സര്ക്കാര് സമര്പ്പിച്ച അപ്പീല് ഹൈക്കോടതി ഫയലില് സ്വീകരിച്ചിരുന്നു. അര്ജ്ജുനെ വെറുതെ വിട്ട വിചാരണക്കോടതി വിധി റദ്ദാക്കണം എന്നാണ് പ്രോസിക്യൂഷന്റെ ആവശ്യം. കേസില് പുതിയ പ്രോസിക്യൂട്ടറെ നിയമിക്കുമെന്ന് മുഖ്യമന്ത്രി പെണ്കുട്ടിയുടെ കുടുംബത്തെ അറിയിച്ചിരുന്നു. വണ്ടിപ്പെരിയാറില് ആറു വയസുകാരിയെ കൊലപ്പെടുത്തിയ കേസില് പ്രതിയെ വെറുതെ വിട്ട സാഹചര്യത്തിലായിരുന്നു കേസിലെ ആശങ്ക അറിയിക്കാനായിരുന്നു കുടുംബം മുഖ്യമന്ത്രിയെ നേരില് കണ്ടത്.
