കൊച്ചി: 300 കോടിയുടെ തട്ടിപ്പുനടന്ന കരുവന്നൂര് സഹകരണബാങ്ക് കേസില് പ്രതിയായ സിപിഎം പ്രദേശിക നേതാവ് പി.ആര്. അരവിന്ദാക്ഷന്റെ ജാമ്യാപേക്ഷ എറണാകുളത്തെ പ്രത്യേക കോടതി തള്ളി.
സിപിഎമ്മിന്റെ വടക്കാഞ്ചേരി നഗരസഭ സ്റ്റാൻഡിംഗ് കമ്മറ്റി ചെയർമാനാണ് പി ആർ അരവിന്ദാക്ഷന്. കരുവന്നൂര് ബാങ്ക് തട്ടിപ്പ് കേസിൽ മൂന്നാം പ്രതി കൂടിയാണ് പി ആർ അരവിന്ദാക്ഷൻ. ഇത് രണ്ടാം തവണയാണ് കൊച്ചിയിലെ പി എം എൽ എ (കള്ളപ്പണം വെളുപ്പിക്കല് തടയല് നിയമ കോടതി) കോടതി ജാമ്യാപേക്ഷ തള്ളിയത്. രണ്ടാം തവണയാണ് ജാമ്യ ഹർജി തള്ളുന്നത്. കരുവന്നൂർ ബാങ്ക് തട്ടിപ്പ് കേസിൽ കഴിഞ്ഞ വർഷം സെപ്റ്റംബർ 27 നാണ് അരവിന്ദാക്ഷൻ അറസ്റ്റിൽ ആയത്.
പി ആർ അരവിന്ദാക്ഷൻ കള്ളപ്പണം വെളുപ്പിച്ചതായാണ് ഇ ഡിയുടെ കണ്ടെത്തൽ. മുഖ്യപ്രതി പി സതീഷ് കുമാറുമായി അരവിന്ദാക്ഷൻ നടത്തിയ സാമ്പത്തിക ഇടപാടുകളുടെ രേഖകളും ഇത് തെളിയിക്കുന്ന ഫോണ് സംഭാഷണങ്ങളും കോടതിയിൽ ഇഡി ഹാജരാക്കിയിരുന്നു. അന്വേഷണം തുടരുന്ന സാഹചര്യത്തിൽ പ്രതികൾക്ക് ജാമ്യം നൽകരുതെന്ന ഇഡിയുടെ വാദം കോടതി അംഗീകരിച്ചു.
എന്നാൽ കള്ളപ്പണം വെളുപ്പിച്ചെന്ന വാദം തെറ്റാണെന്നും തന്റെ അക്കൗണ്ടിലൂടെ നടത്തിയ സാമ്പത്തിക ഇടപാട് ക്വാറി, ഹോട്ടൽ ബിസിനസ് നടന്ന കാലത്തേതാണെന്നുമാണ് അരവിന്ദാക്ഷൻ കോടതിയെ അറിയിച്ചത്. സതീഷ് കുമാറിന്റെ മുൻ ഡ്രൈവറുമായി അരവിന്ദാക്ഷന് അടുപ്പം ഉണ്ടായിരുന്നു.
