ലക്‌നൗ: ധന്യമുഹൂര്‍ത്തത്തിന് ഇനി നാളുകള്‍ മാത്രം. ശ്രീമമന്ത്രങ്ങള്‍ ലോകമെങ്ങും മുഴങ്ങുകയാണ്. ഭക്തിലഹരിയുടെ ആനന്ദലബ്ധിയില്‍ തലയില്‍ ഒരു ജോടി സ്വര്‍ണ പാദുകങ്ങളുമായി അയോദ്ധ്യയിലേയ്‌ക്ക് യാത്ര പുറപ്പെട്ടിരിക്കുകയാണ് ഹൈദരാബാദ് സ്വദേശി. ചര്‍ള ശ്രീനിവാസ ശാസ്ത്രി എന്ന വ്യക്തിയാണ് ശ്രീരാമ ഭഗവാനെ ഭജിച്ചുകൊണ്ട് രാമക്ഷേത്രത്തിലെ പ്രാണപ്രതിഷ്ഠാ ചടങ്ങ് നടക്കുന്ന വേളയില്‍ അയോദ്ധ്യയിലേയ്‌ക്ക് യാത്ര തിരിച്ചിരിക്കുന്നത്.
1,300 കിലോമീറ്ററാണ് കാല്‍ നടയായി ഈ മദ്ധ്യവയസ്‌കന്‍ താണ്ടുന്നത്. രാമക്ഷേത്രത്തിന്റെ മഹത്തായ ഉദ്ഘാടനത്തിന് മുന്നോടിയായി ഉത്തര്‍പ്രദേശ് മുഖ്യമന്ത്രിയെ നേരില്‍ കണ്ട് ഏകദേശം 1.2 കോടി വിലമതിക്കുന്ന ‘സ്വര്‍ണ പാദുകം’ സമ്മാനിക്കുക എന്നതാണ് അദ്ദേഹത്തിന്റെ ലക്ഷ്യം. ഒക്ടോബര്‍ 28 ന് ആന്ധ്രാപ്രദേശിലെ കിഴക്കന്‍ ഗോദാവരി ജില്ലയിലെ വെദുര്‍പാക ഗ്രാമത്തില്‍ നിന്നാണ് ചര്‍ള ശ്രീനിവാസ ശാസ്ത്രി അയോദ്ധ്യയിലേയ്‌ക്ക് പുറപ്പെട്ടത്.
ഭാഗ്യനഗരം സീതാരാമ സേവാ ട്രസ്റ്റ് ഫൗണ്ടേഷന്‍ ഡയറക്ടര്‍ കൂടിയാണ് ശാസ്ത്രി. തുടക്കത്തില്‍ വെള്ളി കൊണ്ടാണ് ശാസ്ത്രി ചെരുപ്പ് ഉണ്ടാക്കിയത്. അന്ന് ഓരോന്നിനും എട്ട് കിലോ തൂക്കം ഉണ്ടായിരുന്നു. പിന്നീട് ചെരുപ്പ് സ്വര്‍ണം പൂശുകയായിരുന്നു. ഇതോടെ ചെരുപ്പിന്റെ ഭാരം 12.5 കിലോ വീതമായി. രാമക്ഷേത്രത്തിലേക്കുള്ള ശാസ്ത്രിയുടെ ആദ്യ സംഭാവനയല്ല ഇത്. ക്ഷേത്രത്തിന്റെ തറക്കല്ലിടല്‍ സമയത്ത് 2.5 കിലോ വീതം ഭാരമുള്ള അഞ്ച് വെള്ളി ഇഷ്ടികകള്‍ അദ്ദേഹം മുമ്പ് സംഭാവന ചെയ്തിട്ടുണ്ട്.
സ്വര്‍ണ പാദുകങ്ങളുമായി അയോദ്ധ്യയിലേക്ക് ചര്‍ള ശ്രീനിവാസ ശാസ്ത്രി; കാല്‍നടയായി താണ്ടുന്നത് 1,300 കിലോമീറ്റര്‍
