തൃശ്ശൂര്‍: പ്രധാനമന്ത്രി നരേന്ദ്ര മോദി ജനുവരി രണ്ടിന് തൃശ്ശൂരിലെത്തും. സ്ത്രീശക്തി മോദിക്കൊപ്പം എന്ന പേരില്‍ ബിജെപി സംഘടിപ്പിക്കുന്ന മഹിളാ സംഗമത്തില്‍ പ്രധാനമന്ത്രി പ്രസംഗിക്കും. രണ്ട് ലക്ഷം വനിതകള്‍ സമ്മേളനത്തില്‍ പങ്കെടുക്കുമെന്ന് ബിജെപി സംസ്ഥാന പ്രസിഡന്റ് കെ. സുരേന്ദ്രന്‍ പറഞ്ഞു.
വടക്കുന്നാഥ ക്ഷേത്ര മൈതാനത്ത് ഉച്ചയ്‌ക്ക് 12നാണ് പരിപാടി. സ്ത്രീകള്‍ക്കു മാത്രമാകും സമ്മേളനത്തില്‍ പ്രവേശനം. വനിതാ സംവരണ ബില്‍ ഉള്‍പ്പെടെ സ്ത്രീകളുടെ ഉന്നമനം ലക്ഷ്യമിട്ട് മോദി സര്‍ക്കാരിന്റെ പദ്ധതികള്‍ നിരവധിയാണ്.
മുത്തലാക്ക് നിരോധനം, ജന്‍ധന്‍ അക്കൗണ്ടുകള്‍, സൗജന്യ പാചക വാതക വിതരണം, സ്വയം തൊഴില്‍ വായ്‌പകള്‍, ശൗചാലയ നിര്‍മാണം, അങ്കണവാടി, ആശാ വര്‍ക്കര്‍മാരുടെ വേതന വര്‍ധന, തൊഴിലുറപ്പ് വേതന വര്‍ധന തുടങ്ങിയ പദ്ധതികളിലൂടെ കോടിക്കണക്കിന് സ്ത്രീകളുടെ ജീവിതത്തില്‍ ഗുണപരമായ മാറ്റമുണ്ടാക്കാനായി. കേരളത്തിലെ സ്ത്രീശക്തി പ്രധാനമന്ത്രിക്കൊപ്പമെന്നതാണ് മഹിളാ സംഗമത്തിന്റെ സന്ദേശമെന്ന് സുരേന്ദ്രന്‍ കൂട്ടിച്ചേര്‍ത്തു. പ്രധാനമന്ത്രിയുടെ സന്ദര്‍ശന ഭാഗമായി ഒരു ലക്ഷം പുരുഷന്മാരുടെ റോഡ് ഷോയും തൃശ്ശൂരിലുണ്ട്.
