ചെങ്ങന്നൂര്: എബിവിപി പ്രവര്ത്തകനായിരുന്ന ചെങ്ങന്നൂര് കോട്ട സ്വദേശി വിശാലിനെ ചെങ്ങന്നൂര് ക്രിസ്ത്യന് കോളജിന് സമീപം ക്യാമ്പസ് ഫ്രണ്ട് പ്രവര്ത്തകര് കുത്തിക്കൊലപ്പെടുത്തിയ കേസില് സാക്ഷി വിസ്താരം 12 ന് ചൊവ്വാഴ്ച മാവേലിക്കര അഡീ. സെഷന്സ് കോടതി ജഡ്ജി എസ്.എസ്. സീന മുമ്പാകെ ആരംഭിക്കും. സംഭവത്തില് വിശാലിനോടൊപ്പം പരുക്കേറ്റ വിഷ്ണു പ്രസാദ്, ശ്രീജിത്ത് എന്നിവരെയാണ് ആദ്യം വിസ്തരിക്കുന്നത്.
2012 ജൂലൈ 16 ന് കോളജിലെ നവാഗതര്ക്ക് സ്വാഗതം ആശംസിക്കുന്ന ചടങ്ങുമായി ബന്ധപ്പെട്ട് സ്ഥലത്തെത്തിയ വിശാല് ഉള്പ്പെടെയുള്ളവരെ മുന്കൂട്ടി തീരുമാനിച്ച പദ്ധതി പ്രകാരം ക്യാമ്പസ് ഫ്രണ്ട് പ്രവര്ത്തകരും പന്തളം സ്വദേശികളുമായ നാസിം, ഷെഫീഖ്, അന്സാര് ഫൈസല്, ഷെഫീക്ക്, ആസിഫ് മുഹമ്മദ്, സനൂജ്, ചെറിയനാട് സ്വദേശികളായ ആഷിക്ക്, നാസിം, അല് താജ്, സഫീര്, അഫ്സല്, വെണ്മണി സ്വദേശിയായ ഷമീര് റാവുത്തര് തുടങ്ങിയവര് സംഘം ചേര്ന്ന് ആക്രമിക്കുകയായിരുന്നു എന്നാണ് പ്രോസിക്യൂഷന് കേസ്.
സംഭവത്തില് വിശാലിന്റെ കൂടെയുണ്ടായിരുന്ന മറ്റു രണ്ടുപേരെ അതീവ ഗുരുതരമായി പ്രതികള് മുറിവേല്പ്പിക്കുകയും മറ്റുള്ളവരെ ശരീരികമായി ഉപദ്രവിക്കുകയും ചെയ്തു എന്നും കുറ്റപത്രത്തില് ആരോപണമുണ്ട്. പോപ്പുലര് ഫ്രണ്ട് പ്രവര്ത്തകര് വിദ്യാര്ത്ഥികള്ക്ക് നേരെ നടത്തിയ ആക്രമണം എന്ന നിലയില് വലിയ ജനശ്രദ്ധ പിടിച്ചുപറ്റിയതായിരുന്നു വിശാലിന്റെ കൊലപാതകം. സംഭവത്തില് ഗുരുതരമായി പരിക്കുപറ്റിയ വിശാല് അന്നു രാത്രിയില് കോട്ടയം മെഡിക്കല് കോളജ് ആശുപത്രിയില് വച്ച് മരണപ്പെട്ടിരുന്നു. ആദ്യം ലോക്കല് പോലീസ് അന്വേഷിച്ച കേസ് തുടര്ന്ന് ക്രൈംബ്രാഞ്ച് ആണ് അന്വേഷിച്ചത്.
കേസില് സംഭവകാലത്ത് പ്രായപൂര്ത്തിയാകാത്ത ആള് ഉള്പ്പെടെ വിവിധ ജില്ലക്കാരായ 20 പ്രതികള്ക്ക് എതിരെയാണ് കുറ്റപത്രം ഫയല് ചെയ്തിരുന്നത്. കേസില് പ്രോസിക്യൂഷന് വേണ്ടി സ്പെഷ്യല് പ്രോസിക്യൂട്ടര് പ്രതാപ് ജി. പടിക്കലിനോടൊപ്പം അഭിഭാഷകരായ ശ്രീദേവി പ്രതാപ്, ശില്പ ശിവന്, ഹരീഷ് കാട്ടൂര് എന്നിവരാണ് ഹാജരാകുന്നത്.
