കൊച്ചി: ഐഎന്‍എസ് വിക്രാന്ത് കാണണമെന്ന ആഗ്രഹം സുരേഷ് ഗോപി സഫലീകരിച്ച് നല്‍കിയതില്‍ സന്തോഷം പങ്കുവച്ച് പ്രൊഫ. എംകെ സാനു. തനിക്ക് പേരക്കുട്ടിയെ പോ
ലെയാണ് സുരേഷ് ഗോപിയെന്ന് സാനുമാഷ് പ്രതികരിച്ചു.
സുരേഷ് ഗോപിയുടെ അമ്മ എന്റെ വിദ്യാര്‍ഥിനിയായിരുന്നു. സുരേഷുമായുള്ള എന്റെ വ്യക്തി ബന്ധത്തിന് ഇതുവരെയും യാതൊരു ഉലച്ചിലും സംഭവിച്ചിട്ടില്ല. ഏറെ വാത്സല്യത്തോടെ ഞാന്‍ കാണുന്ന വ്യക്തിയാണ് സുരേഷ് ഗോപി. ആ ബന്ധത്തിന് ഒരിക്കലും ഉലച്ചിലുണ്ടാകില്ലെന്നും സാനുമാഷ് പറഞ്ഞു.
ഭാരതത്തിന്റെ ആദ്യ തദ്ദേശീയ വിമാനവാഹിനിയായ ഐഎന്‍എസ് വിക്രാന്ത് സന്ദര്‍ശിക്കണമെന്ന സാനുമാഷിന്റെ ആഗ്രഹം കഴിഞ്ഞ ദിവസമാണ് സുരേഷ് ഗോപി നിറവേറ്റിയത്. സുരേഷ് ഗോപി, സാനുമാഷ്, സി.ജി. രാജഗോപാല്‍, പി. രാമചന്ദ്രന്‍ എന്നിവര്‍ ചേര്‍ന്ന് വെള്ളിയാഴ്ച ഉച്ചയ്‌ക്ക് മൂന്ന് മണിയോടെ ഐഎന്‍എസ് വിക്രാന്തിലെത്തി. ഇതിന്റെ ചിത്രങ്ങള്‍ സമൂഹമാധ്യമത്തിലൂടെ നടന്‍ പങ്കുവയ്‌ക്കുകയും ചെയ്തിരുന്നു. സാനുമാഷിന്റെ ആഗ്രഹം നിറവേറ്റാന്‍ സാധിച്ചതില്‍ സന്തോഷമുണ്ടെന്നും സുരേഷ് ഗോപി പറഞ്ഞു.
