ഇന്‍ഡോര്‍: കോണ്‍ഗ്രസ് ജനറല്‍ സെക്രട്ടറി പ്രിയങ്ക വാദ്ര മധ്യപ്രദേശില്‍ നടത്തിയ റാലിയില്‍ ഗോത്രവര്‍ഗക്കാരെ നിലത്തിരുത്തിയത് വിവാദമാകുന്നു.
ധാര്‍ ജില്ലയില്‍ നടന്ന റാലിയിലാണ് ഗോത്രവര്‍ഗക്കാരെ കോണ്‍ഗ്രസ് അവഹേളിച്ചത്. ഗോത്രവര്‍ഗക്കാരെ നിലത്തിരുത്തി കോണ്‍ഗ്രസും പ്രിയങ്ക വാദ്രയും അവഹേളിച്ചതായി ബിജെപി എംപി സുമര്‍ സിങ് സോളങ്കി പത്രസമ്മേളനത്തില്‍ പറഞ്ഞു.
ഗോത്രജനതയ്‌ക്കിരിക്കാനായി കസേര നല്‍കുവാന്‍ കോണ്‍ഗ്രസ് തയാറായില്ല. ഇത്തരത്തിലുള്ള അവഹേളനം കോണ്‍ഗ്രസിന്റെ മുഖമുദ്രയാണ്. ബിജെപി എന്നും ഇവര്‍ക്ക് ഇരിക്കാന്‍ കസേര നല്‍കാറുണ്ടെന്നും സോളങ്കി പറഞ്ഞു.
കോണ്‍ഗ്രസ് ഗോത്രജനതയോട് മാപ്പു പറയണമെന്നും അദ്ദേഹം ആവശ്യപ്പെട്ടു. ഗോത്രജനതയെ ഉയര്‍ത്തിക്കൊണ്ടുവരുന്നതിനുള്ള പ്രവര്‍ത്തനങ്ങളാണ് ബിജെപി നടത്തുന്നതെന്നും അദ്ദേഹം പറഞ്ഞു.
