കോട്ടയം: പുതുപ്പള്ളി ഉപതെരഞ്ഞെടുപ്പുഫലം ഇന്നറിയാം. വോട്ടെണ്ണല് ഇന്നു രാവിലെ എട്ടിന് കോട്ടയം ബസേലിയസ് കോളജില് തുടങ്ങും.
ഇരുപതു മേശകളിലായാണ് വോട്ടെണ്ണല്. 14 മേശകളില് വോട്ടിങ് യന്ത്രത്തിലെ വോട്ടുകളും അഞ്ചു മേശകളില് തപാല് വോട്ടുകളും ഒരു മേശയില് സര്വീസ് വോട്ടര്മാര്ക്കുള്ള ഇടിപിബിഎസ് വോട്ടുകളും എണ്ണും. തപാല് വോട്ടുകളും സര്വീസ് വോട്ടുകളുമാണ് ആദ്യം എണ്ണിത്തുടങ്ങുക.
ഇടിപിബിഎസ് വോട്ടുകളിലെ ക്യൂ ആര് കോഡ് സ്കാന് ചെയ്ത് കൗണ്ടിങ് ഉദ്യോഗസ്ഥര്ക്കു നല്കിയ ശേഷമായിരിക്കും വോട്ടെണ്ണല്. 182 ബൂത്തുകളാണ് പുതുപ്പള്ളി മണ്ഡലത്തിലുള്ളത്. 14 മേശകളിലായി 13 റൗണ്ടുകളായാണ് ഇലക്ട്രോണിക് വോട്ടിങ് യന്ത്രത്തിലെ വോട്ടെണ്ണല്. അഞ്ചിനായിരുന്നു വോട്ടെടുപ്പ്. 72.86 ശതമാനമായിരുന്നു പോളിങ്.
