കൊച്ചി: യുവം സംവാദ വേദിയെ മലയാളത്തില്‍ പ്രധാനമന്ത്രി അഭിസംബോധന ചെയ്തപ്പോള്‍ സദസ്സില്‍ നിന്ന് ആരവമുയര്‍ന്നു. പ്രിയ യുവസുഹൃത്തുക്കളെ അഭിനന്ദനങ്ങള്‍…എന്നായിരുന്നു മോദി സദസ്സിനെ നോക്കി പറഞ്ഞത്.
മോദിയെ കാത്ത് യുവം സംവാദ വേദിയില്‍ ഉണ്ണിമുകുന്ദന്‍, അനില്‍ ആന്‍റണി, അപര്‍ണ്ണ ബാലമുരളി, നവ്യനായര്‍, വിജയ് യേശുദാസ്, ഹരിശങ്കര്‍ ഉള്‍പ്പെടെ വലിയൊരു താരനിര എത്തിയിരുന്നു. നടന്‍ സുരേഷ് ഗോപിയും ഉണ്ടായിരുന്നു. യുവം സംവാദപരിപാടിയില്‍ പ്രതീക്ഷിച്ചതിലും കൂടുതല്‍ പേരാണ് പ്രധാനമന്ത്രിയെ കാത്ത് ഇരിക്കുന്നത്. ഇവര്‍ മണിക്കൂറുകള്‍ക്ക് മുന്‍പേ കസേരകളില്‍ ഇടം പിടിച്ചിരുന്നു. എന്നാല്‍ കസേരയില്‍ ഇരിക്കുന്നവര്‍ക്ക് അപ്പുറമുള്ള ആള്‍ക്കൂട്ടമാണ് സദസ്സില്‍ എത്തിയത്. അതിനാല്‍ പലര്‍ക്കും കിട്ടുന്ന ഇടത്തില്‍ തിങ്ങിക്കൂടി നില്‍ക്കേണ്ട സ്ഥിതിയാണ്.
വിമാനത്തില്‍ വന്നിറങ്ങിയ മോദിയുടെ റോഡ് ഷോ വെണ്ടുരുത്തി പാലത്തിനടുത്ത് നിന്നാണ് ആരംഭിക്കേണ്ടിയിരുന്നത്. എന്നാല്‍ വാഹനത്തില്‍ റോഡ് ഷോ നടത്തും എന്ന ധാരണയെ കാറ്റില്‍ പറത്തി മോദി കാല്‍നടയായി വലിയൊരു ദൂരം നടന്നുനീങ്ങുകയായിരുന്നു.
