ചെന്നൈ: തമിഴ്നാട്ടില്‍ 2024ലെ പൊതുതെരഞ്ഞെടുപ്പില്‍ ബിജെപി 25 സീറ്റുകള്‍ നേടുമെന്ന് ബിജെപി തമിഴ്നാട് അധ്യക്ഷന്‍ അണ്ണാമലൈ. കോയമ്പത്തൂരിലെ മേട്ടുപ്പാളയത്ത് നടന്ന ബിജെപി റാലിയെ അഭിസംബോധന ചെയ്ത് സംസാരിക്കുകയായിരുന്നു അണ്ണാമലൈ.
അടുത്ത തെരഞ്ഞെടുപ്പില്‍ 25ല്‍ അധികാം പാര്‍ലമെന്‍റ് അംഗങ്ങളെ തമിഴ്നാട്ടില്‍ നിന്നും വിജയിപ്പിക്കാനാകുമെന്ന് ബിജെപിയ്‌ക്ക് ആത്മവിശ്വാസമുണ്ട്. തമിഴ്നാടിന്റെ സംസ്ഥാന അധ്യക്ഷന്‍ എന്ന നിലയിലാണ് ഞാന്‍ അത് പറയുന്നത്. ബിജെപി ദേശീയാധ്യക്ഷന്റെയും സംസ്ഥാനത്തെ മറ്റ് മുതിര്‍ന്ന നേതാക്കളുടെയും മുന്നില്‍ വെച്ചാണ് ഇത് പറയുന്നതെന്നും കെ. അണ്ണാമലൈ പറഞ്ഞു.
ഇന്ത്യ നരേന്ദ്രമോദി എന്ന പ്രധാനമന്ത്രിയുടെ സുരക്ഷിതമായ കൈകളിലാണെങ്കിലും തമിഴ്നാട് സുരക്ഷിത കരങ്ങളില്‍ അല്ലെന്നും യോഗം ഉദ്ഘാടനം ചെയ്ത ബിജെപി ദേശീയാധ്യക്ഷന്‍ ജെ.പി. നദ്ദ പറഞ്ഞു. ഡിഎംകെ(DMK) യുടെ ഡി (D) എന്നാല്‍ കുടുംബവാഴ്ച (Dynasty), എം (M) എന്നാല്‍ പണം പിടുങ്ങല്‍ (Money swindling) കെ(K) എന്നാല്‍ അനധികൃത ഭരണം (Katta Panchayat) എന്നിങ്ങനെയാണ് അര്‍ത്ഥമെന്നും നദ്ദ പരിഹസിച്ചു.
