കൊട്ടരക്കര: നരേന്ദ്രമോദി സര്ക്കാരിന്റെ എട്ടാമത് വാര്ഷികാഘോഷത്തിന്റെ ഭാഗമായി കോട്ടാത്തല എഫ്ഐജി ഗ്രൂപ്പിലെ കര്ഷകരെ മുന് മിസോറാം ഗവര്ണര് കുമ്മനം രാജശേഖരന് ആദരിച്ചു. എട്ടുവര്ഷത്തെ ഭരണത്തില് നരേന്ദ്രമോദി സര്ക്കാര് കാര്ഷിക രംഗത്തു കൈ വരിച്ചത് ഉജ്വല നേട്ടങ്ങളാണ്. ഭക്ഷ്യോത്പാദന രംഗത്തു വലിയനേട്ടങ്ങള് ഉണ്ടാക്കാന് സാധിച്ചത് കര്ഷകരുടെ കഠിനാധ്വാന ത്തിന്റെ ഫലമായാണ് അതുകൊണ്ട് വാര്ഷിക ദിനത്തില് മോദിയുടെ ആവശ്യപ്രകാരമാണ് കോട്ടത്തലയുള്പ്പടെയുള്ള സ്ഥലങ്ങളിലെ കര്ഷകരെ നേരിട്ടെത്തി ആദരിക്കാന് എത്തിയതെന്ന് കുമ്മനം രാജശേഖരന് പറഞ്ഞു.
കോട്ടാത്തല എഫ്ഐജി ഗ്രൂപ്പിലെ മൂഴിക്കോട്, കോട്ടാത്തല, പള്ളിക്കല്, പണയില് ഭാഗങ്ങളിലായി അറുപതോളം കര്ഷകരെ കുമ്മനം രാജശേഖരന് നേരിട്ടെത്തി പൊന്നാട അണിയിച്ചു ആദരിച്ചു. കേന്ദ്ര സര്ക്കാര് നടപ്പാക്കിയ പദ്ധതികള് വിവരിക്കുന്ന ലഘുലേഖകള് വിതരണം ചെയ്തു. പരിപാടിയില് കര്ഷകമോര്ച്ച ജില്ലാ പ്രസിഡന്റ് ഡി. സുരേഷ്, സെക്രട്ടറി ഉദയകുമാര്, ജില്ലാകമ്മിറ്റി അംഗം അജയന് ജി. നായര്, മണ്ഡലം വൈസ് പ്രസിഡന്റ് സോമരാജന്, ബിജെപി മണ്ഡലം പ്രസിഡന്റ് അനിഷ് കിഴക്കേക്കര, സെക്രട്ടറി അരുണ് കാടംകുളം, ഏരിയ പ്രസിഡന്റ് കൃഷ്ണന്കുട്ടി, സുരേഷ് അമ്പലപ്പുറം എന്നിവര് സംബന്ധിച്ചു.
