ഹൈദരാബാദ്: കോണ്‍ഗ്രസ് നേതാവ് രാഹുല്‍ ഗാന്ധിക്കെതിരെ വിമര്‍ശനവുമായി ആള്‍ ഇന്ത്യ മജിലിസ്-ഇ-ഇത്തിഹാദുല്‍ മുസ്‌ലിമീന്‍ നേതാവ് അസദുദ്ദീന്‍ ഒവൈസി. അടുത്ത തെരഞ്ഞെടുപ്പില്‍ വയനാട്ടിലും രാഹുല്‍ ഗാന്ധി തോല്‍ക്കുമെന്ന് ഒവൈസിപറഞ്ഞു. രാഹുല്‍ ഗാന്ധിയുടെ തെലങ്കാന സന്ദര്‍ശനത്തിനിടെയാണ് ഒവൈസിയുടെ പ്രതികരണം.
രാഹുല്‍ ഗാന്ധി വയനാട്ടില്‍ നിന്ന് ഇനിയും മത്സരിക്കുകയാണെങ്കില്‍ പരാജയമായിരിക്കും ഫലം. അദ്ദേഹത്തെ ഞാന്‍ ഹൈദരാബാദിലേക്ക് ക്ഷണിക്കുകയാണ്. ഇവിടെ നിന്ന് മത്സരിച്ച് തന്റെ ഭാഗ്യം പരീക്ഷിക്കാന്‍ തയ്യാറാകണമെന്നും ഒവൈസി പറഞ്ഞു. മേഡക്കില്‍ നിന്ന് വേണമെങ്കിലും മത്സരിക്കാം ഒവൈസി കൂട്ടിച്ചേര്‍ത്തു.
Â
തെലങ്കാന സന്ദര്‍ശനം നടത്തുന്ന രാഹുല്‍, താന്‍ വന്നിരിക്കുന്നത് ടിആര്‍എസ്, ബിജെപി, എഐഎംഐഎം എന്നിവര്‍ക്ക് വെല്ലുവിളിയുമായിട്ടാണെന്ന് പ്രസ്താവിച്ചിരുന്നു. ഇതിനോട് പ്രതികരിക്കുകയായിരുന്നു ഒവൈസി.രാഹുല്‍ ഗാന്ധി വയനാട്ടില്‍ തോല്‍ക്കുമെന്ന് ഉറപ്പുള്ളതുകൊണ്ടാണ് താന്‍ ഇക്കാര്യം പറയുന്നതെന്ന് ഒവൈസി പറഞ്ഞതായി വാര്‍ത്താ ഏജന്‍സിയായ എ.എന്‍.ഐ റിപ്പോര്‍ട്ട് ചെയ്യുന്നു.
ഹൈദരാബാദിലെ ചാന്‍ചാലഗുഡ സെന്‍ട്രല്‍ ജയിലിലും രാഹുല്‍ ഗാന്ധി സന്ദര്‍ശനം നടത്തിയിരുന്നു. അറസ്റ്റിലായ എന്‍.എസ്.യു.ഐ നേതാക്കളെ കാണാനാണ് അദ്ദേഹം ജയിലിലെത്തിയത്.
