ഇസ്ലാമബാദ് : അഴിമതിക്കേസില്‍ പ്രതിയായതിന് പിന്നാലെ അറസ്റ്റ് ഭയന്ന് പാക് പ്രധാനമന്ത്രി ഇമ്രാന്‍ ഖാന്റെ ഭാര്യയുടെ സുഹൃത്ത് രാജ്യം വിട്ടു. ഇമ്രാന്‍ ഖാന്റെ മൂന്നാം ഭാര്യ ബുഷ്‌റാ ബീവിയുടെ സുഹൃത്ത് ഫറ ഖാന്‍ 90,000 ഡോളറുമായി മുങ്ങിയെന്ന് പ്രതിപക്ഷത്തിന്റേതാണ് ആരോപണം.
ദുബായിലേക്കാണ് ഫറ ഖാന്‍ പോയതെന്നാണ് വിവരം. ഫറാ ഖാന്‍ ആഡംബര വിമാനത്തില്‍ ഇരുന്ന് യാത്ര ചെയ്യുന്നതിന്റെ ചിത്രങ്ങളും സമൂഹ മാധ്യമങ്ങളിലുണ്ട്. എന്നാല്‍ ഫോട്ടോ എപ്പോള്‍ എടുത്തതാണെന്നതില്‍ വ്യക്തതയില്ല. ഇവരുടെ ഭര്‍ത്താവ് അഹ്‌സന്‍ ജമീല്‍ ഗുജ്ജാര്‍ നേരത്തെ തന്നെ അമേരിക്കയിലേക്ക് കടന്നിരുന്നു.
പാക് സര്‍ക്കാര്‍ ഉദ്യോഗസ്ഥരെ അവരുടെ ഇഷ്ടപ്രകാരം സ്ഥലം മാറ്റുന്നതിനും പുതുതായി നിയമിക്കുന്നതിനും ഫറ കോടികള്‍ കൈക്കൂലി വാങ്ങിയെന്നതാണ് ഇവര്‍ക്കെതിരായ ആരോപണം. അഴിമതികളുടെ മാതാവ്’ എന്നാണ് പ്രതിപക്ഷം ഫറാ ഖാനെ വിശേഷിപ്പിച്ചത്. ആറ് ബില്യണ്‍ പാക്കിസ്ഥാന്‍ രൂപയുടെ (32 മില്യണ്‍ ഡോളര്‍) അഴിമതി ഇവര്‍ നടത്തിയെന്നതാണ് ഫറയ്‌ക്കെതിരായ ആരോപണം.
