ന്യൂദല്‍ഹി: ബാബറും ഹുമയൂണും രാജ്യസ്‌നേഹികളായിരുന്നുവെന്ന് പറഞ്ഞ് മുഗള്‍ രാജാക്കന്മാരെ വാനോളം പുകഴ്ത്തി കോണ്‍ഗ്രസ് നേതാവ് മണിശങ്കര്‍ അയ്യര്‍.
ബ്രിട്ടീഷുകാര്‍ ഇന്ത്യ ഭരിയ്‌ക്കുക മാത്രം ചെയ്തപ്പോള്‍ മുഗളന്മാര് ഇന്ത്യയിലേക്ക് വന്ന് ഇന്ത്യയെ അവരുടെ വീടാക്കിമാറ്റിയവരാണെന്നും മണിശങ്കര്‍ അയ്യര്‍ പറഞ്ഞു. മുഗളന്മാര് മതപരമായ പീഡനങ്ങള്‍ക്കോ മതപരിവര്‍ത്തനത്തിനോ ശ്രമിച്ചില്ലെന്നും അവരെ പ്രകീര്‍ത്തിച്ചുകൊണ്ടുള്ള പ്രസംഗത്തില്‍ മണി ശങ്കര്‍ അയ്യര്‍ പറഞ്ഞു. നെഹ്രു ജയന്തിയോടനുബന്ധിച്ച് നടത്തിയ ഈ പ്രസംഗം ഇപ്പോള്‍ വിവാദമായിരിക്കുകയാണ്.
കോണ്‍ഗ്രസ് പല രീതിയില്‍ ഹിന്ദുത്വത്തെ ആക്രമിക്കുകയും ന്യുനപക്ഷങ്ങളെ പരസ്യമായി പ്രീണിപ്പുക്കുകയും ചെയ്യുന്ന പ്രവണതയുടെ ഭാഗമായിട്ടാണ് മണി ശങ്കര്‍ അയ്യരുടെ ഈ പ്രസംഗവും വിലയിരുത്തപ്പെടുന്നത്. കഴിഞ്ഞ ദിവസം ഹിന്ദുത്വത്തെ ഇസ്ലാമിക് സ്റ്റേറ്റുമായും ബൊക്കോ ഹറാമുുമായും താരതമ്യംചെയ്തുകൊണ്ട് മറ്റൊരു കോണ്‍ഗ്രസ് നേതാവ് സല്‍മാന്‍ ഖുര്‍ഷിദ് രചിച്ച പുസ്തകവും വിവാദമായിട്ടുണ്ട്.
ഇതില്‍ മുഗളന്മാര് ഹി്ന്ദുക്കളെ മതപരമായ പീഢനങ്ങള്‍ക്ക് വിധേയമാക്കിയിട്ടില്ലെന്ന മണിശങ്കര്‍ അയ്യരുടെ പ്രസ്താവന തര്‍ക്കവിഷയമാണ്. കാരണം ചരിത്രത്തില്‍ മുഗള്‍ സാമ്രാജ്യ ചക്രവര്‍ത്തിമാര്‍ ഹിന്ദുക്കളുടെ തലവെട്ടിയിരുന്നതായും ഹിന്ദുക്ഷേത്രങ്ങള്‍ കൊള്ളയടിച്ചതായും ചരിത്രവസ്തുത നിലനില്‍ക്കവേ, ഒരു പണ്ഡിതന്‍കൂടിയായ മണി ശങ്കര്‍ അയ്യര്‍ എന്തുകൊണ്ട് ഇങ്ങിനെയൊരു അഭിപ്രായപ്രകടനം നടത്തിയെന്നത് പലരെയും അത്ഭുതപ്പെടുത്തുന്നു. ഇതിന് പിന്നില്‍ ഉത്തര്‍പ്രദേശ് തിരഞ്ഞെടുപ്പിന്റെ ഭാഗമായുള്ള ഇസ്ലാം പ്രീണനമാണെന്നാണ് പറയുന്നത്.
ഹിന്ദുക്കളല്ലാത്തവരെ ഇന്ത്യക്കാരായി ബിജെപി കാണുന്നില്ലെന്നും മണി ശങ്കര്‍ അയ്യര്‍ പ്രസംഗത്തില്‍ കുറ്റപ്പെടുത്തി. ‘666 വര്‍ഷങ്ങളോളം ദല്‍ഹി സിംഹാസനത്തിലിരുന്നവരാണ് മുസ്ലിം സുല്‍ത്താന്‍മാരും മുസ്ലിം രാജാക്കന്മാരും ചക്രവര്‍ത്തിമാരും. അതിന് ശേഷം എത്ര മുസ്ലിങ്ങളും ഹിന്ദുക്കളും രാജ്യം വിട്ടുപോയി? കഴിഞ്ഞ 100-125വര്‍ഷത്തെ ചരിത്രം ഈ സംഖ്യ കൃത്യമായി പറയുന്നു. 666 വര്‍ഷങ്ങള്‍ കഴിഞ്ഞിട്ടും മുസ്ലിങ്ങളുടെ ജനസംഖ്യ 24 ശതമാനവും ഹിന്ദുക്കളുടെ ജനസംഖ്യ 72 ശതമാനവുമാണ്. എല്ലാ പെണ്‍കുട്ടികളെയും മുസ്ലിം സുല്‍ത്താന്‍മാര്‍ ബലാത്സംഗം ചെയ്തു. എല്ലാവരെയും ഹിന്ദുമതത്തിലേക്ക് പരിവര്‍ത്തനം ചെയ്തു എന്നാണ് പറയുന്നത്. ഇത് സത്യമാണെങ്കില്‍ ജനസംഖ്യയുടെ 72 ശതമാനവും മുസ്ലിങ്ങള്‍ ആയേനെ,’ ഇങ്ങിനെ പോകുന്ന ചരിത്രം വളച്ചൊടിച്ചുകൊണ്ടുള്ള മണിശങ്കര്‍ അയ്യരുടെ പ്രസംഗം. വെറും ആയുധബലം കൊണ്ട് മാത്രമാണ് എണ്ണത്തില്‍ കുറവായ മുസ്ലിംചക്രവര്‍ത്തിമാര്‍ ഹിന്ദുഭൂരിപക്ഷപ്രദേശമായ ഇന്ത്യയെ ആക്രമിച്ച് കീഴടക്കിയത് എന്ന വസ്തുത മണിശങ്കര്‍ അയ്യര്‍ മനപൂര്‍വ്വം മറയ്‌ക്കുകയാണ്. ബുദ്ധിമാനായ മണിശങ്കര്‍ അയ്യരുടെ ലക്ഷ്യം ചരിത്രപരമായ സത്യസന്ധതയല്ല, പകരം ഇസ്ലാമിക പ്രീണനം മാത്രമാണ്.
‘ജിന്ന പറഞ്ഞത് 30 ശതമാനം സംവരണം മുസ്ലിങ്ങള്‍ക്ക് നല്‍കാനാണ്. അല്ലാതെ 80-90 ശതമാനം സംവരണം വേണമെന്ന് പറഞ്ഞില്ല. മുസ്ലിങ്ങള്‍ വന്നിട്ടും മുസ്ലിം രാഷ്‌ട്രമാകാതിരുന്ന ഒരേയൊരു രാജ്യം ഇന്ത്യയാണ്,’ മണിശങ്കര്‍ അയ്യര്‍ പറയുന്നു. എന്നാല്‍ ഇവിടെ മുസ്ലിങ്ങള്‍ക്ക് പ്രത്യേക രാജ്യം വേണമെന്ന് പറഞ്ഞ് ഇന്ത്യയെ രണ്ടായി മതത്തിന്റെ പേരില്‍ വെട്ടിമുറിക്കാന്‍ മുന്‍കയ്യെടുത്ത ജിന്നയെ മറച്ചുപിടിച്ചുകൊണ്ടുള്ള പ്രസംഗത്തി്‌ന്റെ ലക്ഷ്യം സാമാന്യബോധമുള്ളവര്‍ക്ക് അറിയാവുന്നതേയുള്ളൂ.
