ന്യൂദല്‍ഹി: പ്രതിരോധ എക്സ്പോ 2022നു മുന്നോടിയായി സൗഹൃദ വിദേശ രാജ്യങ്ങളെയും ആഗോള പ്രതിരോധ ഉത്പാദന വ്യവസായങ്ങളെയും വിശ്വാസത്തിലെടുക്കുക ലക്ഷ്യമിട്ട് 2021 ഒക്ടോബര്‍ 25 ന് ന്യൂദല്‍ഹിയില്‍ സംഘടിപ്പിച്ച അംബാസഡര്‍മാരുടെ വട്ട മേശ സമ്മേളനത്തില്‍ രാജ്യ രക്ഷാ മന്ത്രി രാജ്‌നാഥ് സിംഗ് അധ്യക്ഷത വഹിച്ചു. 2022 മാര്‍ച്ച് 10 മുതല്‍ 13 വരെ ഗുജറാത്തിലെ ഗാന്ധിനഗറില്‍ നടക്കുന്ന പ്രതിരോധ എക്സ്പോ 2022ന്റെ ആസൂത്രണം, ക്രമീകരണങ്ങള്‍, മറ്റ് വിശദാംശങ്ങള്‍ എന്നിവ സംബന്ധിച്ച് വിദേശ മിഷനുകളുടെ അംബാസഡര്‍മാരെ ധരിപ്പിക്കുകയായിരുന്നു യോഗത്തിന്റെ ലക്ഷ്യം.
ഇന്ത്യന്‍ പ്രതിരോധ ഉത്പന്നങ്ങളില്‍ വര്‍ദ്ധിച്ചുവരുന്ന ആഗോള താത്പര്യത്തിന്റെ സൂചനയായി അംബാസഡര്‍മാര്‍, സ്ഥാനപതിമാര്‍, പ്രതിരോധ അറ്റാഷെമാര്‍ തുടങ്ങിയവരുള്‍പ്പെടെ 200 ലധികം പ്രതിനിധികള്‍ വട്ടമേശ സമ്മേളനത്തില്‍ പങ്കെടുത്തു. സംയുക്ത സേന മേധാവി ജനറല്‍ ബിപിന്‍ റാവത്ത്, വ്യോമസേന മേധാവി എയര്‍ ചീഫ് മാര്‍ഷല്‍ വി ആര്‍ ചൗധരി, പ്രതിരോധ മന്ത്രാലയത്തിലെയും ഗുജറാത്ത് സര്‍ക്കാരിലെയും മുതിര്‍ന്ന ഉദ്യോഗസ്ഥര്‍ തുടങ്ങിയവരും പങ്കെടുത്തു.
പരസ്പര സഹകരണത്തിന്റെ അടിസ്ഥാനത്തിലുള്ള ഗുണപ്രദമായ പ്രതിരോധ വ്യാപാരത്തിലേര്‍പ്പെടാന്‍ ഇന്ത്യയ്‌ക്ക് തുറന്ന മനസ്സാണെന്ന് ഏഷ്യയിലെ ഏറ്റവും വലിയ പ്രതിരോധ പ്രദര്‍ശനമായ പ്രതിരോധ എക്സ്പോ 2022 ല്‍ പങ്കെടുക്കാനായി വിദേശ പ്രതിനിധികളെ ക്ഷണിച്ചുകൊണ്ട് രാജ്‌നാഥ് സിംഗ് പറഞ്ഞു. പ്രതിരോധ എക്സ്പോ 2022ലൂടെ ഏറ്റവും നവീനമായ സാങ്കേതികവിദ്യകളെല്ലാം ഒരു കുടക്കീഴില്‍ കൊണ്ടുവരാനാകുമെന്നും ബഹിരാകാശ, പ്രതിരോധ വ്യവസായ മേഖലകളിലെ ബന്ധപ്പെട്ട കക്ഷികള്‍ക്ക് എണ്ണമറ്റ അവസരങ്ങള്‍ പ്രദാനം ചെയ്യാനാകുമെന്നും അദ്ദേഹം ആത്മവിശ്വാസം പ്രകടിപ്പിച്ചു.
വിജയപ്രദമായ പുതുസംരംഭങ്ങള്‍, അന്താരാഷ്‌ട്ര പങ്കാളിത്തം, സമൃദ്ധി, നിക്ഷേപ വര്‍ധന, ഉത്പാദന വിപുലീകരണം എന്നിവയിലൂടെ ഇന്ത്യയുടെ ബഹിരാകാശപ്രതിരോധ വ്യവസായം ശക്തിപ്പെടുത്തുന്നതിനും നമ്മുടെ സുഹൃദ് രാജ്യങ്ങളുടെ പ്രതിരോധ ആവശ്യങ്ങള്‍ നിറവേറ്റാനും പ്രതിരോധ എക്സ്പോ 2022 വഴിതുറക്കുമെന്ന് രാജ്‌നാഥ് സിംഗ് പറഞ്ഞു. കഴിഞ്ഞ അഞ്ച് വര്‍ഷത്തിനിടയില്‍ പ്രതിരോധ കയറ്റുമതി 334% വര്‍ദ്ധിച്ചതായും ഇന്ത്യയിപ്പോള്‍ 75 ലധികം രാജ്യങ്ങളിലേക്ക് കയറ്റുമതി ചെയ്യുന്നുണ്ടെന്നും രാജ്യ രക്ഷാ മന്ത്രി പറഞ്ഞു.
പ്രതിരോധ എക്സ്പോ 2022 വെബ്സൈറ്റ് (www.defexpo.gov.in) രാജ്യ രക്ഷാ മന്ത്രി ഉദ്‌ഘാടനം ചെയ്തു. തദ്ദേശീയ പ്രതിരോധ ഉത്പന്നങ്ങളെക്കുറിച്ചുള്ള വിജ്ഞാന പ്രദമായ ഉള്ളടക്കം ലഭ്യമാക്കുന്നതിന് പുറമേ, പ്രദർശകർക്ക് ഓൺലൈൻ സേവനങ്ങളും വെബ്സൈറ്റ് നൽകുന്നു. ഓൺലൈനായി, ഫസ്റ്റ്-കം-ഫസ്റ്റ്-സെർവ് (first-come-first-serve) അടിസ്ഥാനത്തിൽ സ്ഥലം ബുക്ക് ചെയ്യാനും പണമൊടുക്കാനും, ബിസിനസ്സ്-ടു-ബിസിനസ് (ബി2ബി) യോഗങ്ങൾക്കായി കോൺഫറൻസ് ഹാളുകൾ ബുക്ക് ചെയ്യാനും വെബ്സൈറ്റ് സൗകര്യമൊരുക്കുന്നു.
വ്യാപാരികൾക്ക്, 2022 മാർച്ച് 10, 11 തീയതികളിൽ പ്രദർശനം സന്ദർശിക്കുന്നതിനായി വെബ്‌സൈറ്റിൽ ടിക്കറ്റുകൾ ലഭ്യമാകും. മാർച്ച് 12, 13 തീയതികളിൽ പൊതുജനങ്ങൾക്ക് സൗജന്യ പ്രവേശനം അനുവദിക്കും. പ്രതിരോധ പ്രസിദ്ധീകരണങ്ങളും മാധ്യമങ്ങളും വെബ്സൈറ്റ് വഴി ഓൺലൈനായി രജിസ്റ്റർ ചെയ്യണം.
