കോഴിക്കോട്: സംസ്ഥാന സര്ക്കാരിന്റെ കേരള സ്റ്റാര്ട്ട് അപ്പ് മിഷന് കീഴിലുള്ള കോഴിക്കോട്ടെ സൈബര് പാര്ക്കില് പ്രവര്ത്തിക്കുന്ന സ്റ്റാര്ട്ട് അപ്പ് കമ്പനികളെ ഒഴിപ്പിക്കുന്നത് സ്വകാര്യ സൈബര് പാര്ക്കിനെ സഹായിക്കാനും ബ്രിട്ടീഷ് കമ്പനിക്ക് സര്ക്കാര് സംവിധാനം കൈമാറാനും. കമ്യൂണിസ്റ്റ് സര്ക്കാരിന്റെ വിചിത്ര നയത്തോട് ഐടി മേഖലയില് നിന്ന് കടുത്ത വിമര്ശനമുയരുന്നു.
സൈബര് പാര്ക്കില് നിന്ന് ഒഴിപ്പിക്കുന്ന സംരംഭകര്ക്ക് ഊരാളുങ്കല് ലേബര് കോണ്ട്രാക്ട് കോ ഓപ്പറേറ്റീവ് സൊസൈറ്റിക്ക് കീഴില് പ്രവര്ത്തിക്കുന്ന കോഴിക്കോട് ഊരാളുങ്കല് (യുഎല്) സൈബര് പാര്ക്കില് ഇടം നല്കുമെന്നാണ് വാഗ്ദാനം. മൊബൈല് ടെന് എക്സില് നിന്ന് ഇന്ക്യൂബേഷന് കേന്ദ്രത്തില് പ്രവര്ത്തിക്കുന്ന 33 സ്റ്റാര്ട്ട് അപ്പ് കമ്പനികളെയാണ് ഒഴിപ്പിക്കുന്നത്. 17 എണ്ണത്തിന് നോട്ടീസ് നല്കി. കൊവിഡ് പ്രതിസന്ധിയെ തുടര്ന്ന് ഒരു വര്ഷത്തിലധികമായി സ്റ്റാര്ട്ട് അപ്പ് കമ്പനികളില് നിന്ന് വാടക വാങ്ങാറില്ല. സാമ്പത്തിക പ്രതിസന്ധിയില് നിന്ന് ഇനിയും കരകയറിയിട്ടില്ലാത്ത ചെറുകിട സംരംഭകര്ക്ക് ഈ ഒഴിപ്പിക്കല് തിരിച്ചടിയാകും. കേരളത്തില് നിന്നുള്ള ഉത്പന്നാധിഷ്ഠിത ഐടി സ്റ്റാര്ട്ട് അപ്പുകള്സര്ക്കാര് സൈബര് പാര്ക്കില് പ്രവര്ത്തനമാരംഭിച്ചാല് സ്റ്റാര്ട്ട് അപ്പ് മിഷന്റെ സാമ്പത്തിക സഹായം ലഭിക്കുമെന്ന് വാഗ്ദാനം നല്കിയാണ് ചെറുകിട സംരംഭകരെ ഇവിടെ എത്തിച്ചിരുന്നത്.
കോഴിക്കോട് സൈബര് പാര്ക്ക് കാമ്പസ്സില് 113 കമ്പനികളാണ് പ്രവര്ത്തിക്കുന്നത്. ഇന്റര്നെറ്റ് ആന്ഡ് മൊബൈല് അസോസിയേഷന് ഓഫ് ഇന്ത്യയുടെ സഹകരണത്തോടെ 2018 മുതല് പ്രവര്ത്തിച്ചിരുന്ന കമ്പനികളുടെ കൂട്ടായ്മയാണ് മൊബൈല് ടെന് എക്സ്. ഇപ്പോള് 850ലേറെ പേര് ഇവിടെ തൊഴിലെടുക്കുന്നുണ്ട്.
