തിരുവനന്തപുരം: സിപിഎം ചരിത്രത്തില് ആദ്യമായി സ്വാതന്ത്ര്യദിനം ആഘോഷിക്കുന്നതിനെ സ്വാഗതം ചെയ്ത് ബിജെപി. ആഗസ്റ്റ് 15 ആപത്ത് 15 എന്ന് പറഞ്ഞ് നടന്നവരാണവര്. കഴിഞ്ഞ 74 സ്വാതന്ത്രദിനങ്ങള് ആഘോഷിക്കാത്തത് എന്താണെന്ന് അവര് വ്യക്തമാക്കണമെന്നും ബിജെപി ദേശീയ നിര്വാഹക സമിതി അംഗം പികെ കൃഷ്ണദാസ് പറഞ്ഞു.
75ാം സ്വാതന്ത്രദിനത്തിന് മാത്രം എന്താണ് പ്രത്യേകത എന്ന് വ്യക്തമാക്കണം. ആര്എസ്എസിനെതിരെയാണ് സ്വാതന്ത്ര്യ ദിനാഘോഷം എന്നാണ് സിപിഎം പറയുന്നത്. ദേശദ്രോഹ സ്വഭാവത്തില് പ്രവര്ത്തിച്ച ഒരു പാര്ട്ടിയെ കൊണ്ട് സ്വാതന്ത്രദിനം ആഘോഷിപ്പിക്കാന് സാധിച്ചത് ആര്എസ്എസ്സിന്റെ വിജയമാണെന്നും കൃഷ്ണദാസ് പറഞ്ഞു.
രാജ്യത്തിന് സ്വാതന്ത്ര്യം കിട്ടിയെന്ന് സിപിഎം ഇപ്പോള് വിശ്വസിക്കുന്നുണ്ടോയെന്ന് കൃഷ്ണദാസ് ചോദിച്ചു. ക്വിറ്റ് ഇന്ത്യാ സമരത്തെ ഒറ്റുകൊടുത്തതും ഗാന്ധിജിയേയും നേതാജിയേയും അപമാനിച്ചതും ശരിയായോയെന്നും സിപിഎം വ്യക്തമാക്കണമെന്നും കൃഷ്ണദാസ് പറഞ്ഞു.
രാജ്യത്തിന്റെ 75 ാം സ്വാതന്ത്ര്യദിനം പാര്ട്ടി വിപുലമായി ആഘോഷിക്കാനൊരുങ്ങുകയാണെന്ന് സിപിഎം കേന്ദ്ര കമ്മിറ്റി അംഗം സുജന് ചക്രബര്ത്തിയാണ് മാധ്യമങ്ങളെ അറിയിച്ചത്. രാജ്യത്തിന്റെ സ്വാതന്ത്ര്യ ലബ്ദി പാര്ട്ടി ഓഫീസുകളില് ആഘോഷിക്കണമെന്ന നിര്ദേശം സിപിഎം കേന്ദ്ര കമ്മിറ്റിയില് അവതരിപ്പിച്ചത് ബംഗാള് ഘടകമാണ്. ആഘോഷത്തിന്റെ ഭാഗമായി സ്വാതന്ത്ര്യദിനത്തില് രാജ്യത്തെ എല്ലാ പാര്ട്ടി ഓഫീസുകളിലും ദേശീയ പതാക ഉയര്ത്തുമെന്നും പശ്ചിമ ബംഗാളില് നിന്നുള്ള മുതിര്ന്ന നേതാവായ സുജന് വ്യക്തമാക്കിയിരുന്നു.
ആദ്യമായാണ് ഇത്തരത്തില് പാര്ട്ടി ഓഫീസുകളില് ദേശീയ പതാക ഉയര്ത്തുന്നത്. ഞങ്ങള് സാധാരണയായി സ്വാതന്ത്ര്യ ദിനം ആചരിക്കുന്നത് ഫാസിസ്റ്റ് ശക്തികള്, വര്ഗീയ ശക്തികള് രാജ്യം അഭിമുഖീകരിക്കുന്ന പ്രശ്നങ്ങളെക്കുറിച്ചും അപകടങ്ങളെക്കുറിച്ചും ചര്ച്ചകള് നടത്തിക്കൊണ്ടാണ്. ഇത്തവണ ദിവസം കൂടുതല് വിപുലമായി നടക്കുമെന്നു സുജന് പ്രതികരിച്ചിരുന്നു. സ്വാതന്ത്ര്യ ദിനത്തില് പാര്ട്ടി ഓഫീസുകളില് ദേശീയ പതാകയും പാര്ട്ടി പതാകയും ഉയരുമെന്ന് മറ്റൊരു സിപിഎം നേതാവ് പ്രഖ്യാപിച്ചിരുന്നു.
