ന്യൂദല്ഹി : രാജ്യത്തെ സിനിമാ വ്യാജപതിപ്പുകള് പ്രചരിക്കുന്നതിന് പൂട്ടിടാന് കേന്ദ്രസര്ക്കാര്. സിനിമയുടെ വ്യാജ പതിപ്പുകള് നിര്മിക്കുന്നവര്ക്ക് തടവ് ശിക്ഷയും പിഴയും നല്കാന് കേന്ദ്രസര്ക്കാര് ശുപാര്ശ നല്കി. ഇതിനായി കേന്ദ്രം കരട് ബില്ലും തയ്യാറാക്കി കഴിഞ്ഞു.
സിനിമാട്ടോഗ്രാഫ് ഭേദഗതി നിയമ പ്രകാരം സിനിമയുടെ വ്യാജപതിപ്പുകള് നിര്മിക്കുന്നതായി ശ്രദ്ധയില് പെട്ടാല് അവര്ക്കെതിരെ മൂന്ന് മാസം വരെ തടവും മൂന്ന് ലക്ഷം രൂപവരെ പിഴയും ചുമത്തുന്നതാണ്. ഇതോടൊപ്പം സിനിമാ നയങ്ങള് സമഗ്രമായി പരിഷ്കരിക്കാനും കേന്ദ്ര സര്ക്കാര് തീരുമാനിച്ചിട്ടുണ്ട്.
സെന്സര് ചെയ്ത ചിത്രങ്ങള് വീണ്ടും പരിശോധിക്കാനും ഇതിലൂടെ സാധിക്കും. നിലവില് സിനിമയുടെ പ്രദര്ശനത്തിന് അനുമതി നല്കുന്നത് സെന്സര് ബോര്ഡുകളാണ്. പുതിയ ഭേദഗതി നിയമപ്രകാരം സെന്സര് ബോര്ഡിന്റെ തീരുമാനത്തില് ഇടപെടാന് കേന്ദ്രസര്ക്കാരിന് സാധിക്കും. വ്യാജപതിപ്പിറക്കിയതായി പരാതി ലഭിച്ചാല് സെന്സര്ബോര്ഡ് അനുമതി നല്കിയ സിനിമകള് കേന്ദ്രത്തിന് പുനഃപരിശോധിക്കാം. പായത്തിന് അനുസരിച്ചാണ് സെന്സറിങ്.
സെന്സര് ബോര്ഡ് അനുമതി നല്കിയ സിനിമകള് പുനഃപരിശോധിക്കാമെന്ന കേന്ദ്രത്തിന്റെ തീരുമാനം നേരത്തെ കര്ണാടക ഹൈക്കോടതി റദ്ദാക്കിയിരുന്നു. 2000 നവംബറില് സുപ്രീം കോടതിയും ഇത് അംഗീകരിച്ചു. എന്നാല് ഇതിനെതിരാണ് പുതിയ ഭേദഗതി.
കരട് ബില്ലില് കേന്ദ്ര സര്ക്കാര് പൊതുജനാഭിപ്രായം തേടി. ജൂലൈ രണ്ടിനുള്ളില് അഭിപ്രായം വാര്ത്താ വിതരണ പ്രക്ഷേപണ മന്ത്രാലയത്തെ അറിയിക്കാനാണ് നിര്ദ്ദേശം നല്കിയിരിത്തുന്നത്.
