പുതുച്ചേരി : രാഹുല്‍ഗാന്ധിയുടെ സന്ദര്‍ശനത്തിനിടെ തനിക്കെതിരെ ജനം ഉന്നയിച്ച പരാതി മനപ്പൂര്‍വ്വം തെറ്റിച്ച് പരിഭാഷപ്പെടുത്തി കോണ്‍ഗ്രസ് മുഖ്യമന്ത്രി. രാഹുലിന്റെ സന്ദര്‍ശനത്തിനിടെ പുതുച്ചേരി മുഖ്യമന്ത്രി വി. നാരായണസ്വാമിക്കെതിരെ ജനങ്ങളില്‍ നിന്നും പരാതി ഉയര്‍ന്നിരുന്നു. ഇതാണ് മനപ്പൂര്‍വ്വം മാറ്റി പരിഭാഷപ്പെടുത്തിയത്.
ചുഴലിക്കാറ്റുണ്ടാപ്പോള്‍ മുഖ്യമന്ത്രി തിരിഞ്ഞു നോക്കിയില്ല. പ്രശ്‌ന ബാധിത പ്രദേശങ്ങള്‍ സന്ദര്‍ശിച്ച് അവശ്യം വേണ്ട നടപടികള്‍ കൈക്കൊള്ളാനോ ഒന്നും നാരായണസ്വാമി തയ്യാറായില്ലെന്ന് മത്സ്യത്തൊഴിലാളിയായ സ്ത്രീ പരാതി പറഞ്ഞു.
ഇത് പരിഭാഷപ്പെടുത്താന്‍ ആവശ്യപ്പെട്ടപ്പോള്‍ ചുഴലിക്കാറ്റുണ്ടായ സമയത്ത് താന്‍ സന്ദര്‍ശനം നടത്തുകയും ജനങ്ങള്‍ക്ക് വേണ്ട സഹായങ്ങള്‍ ചെയ്ത് നല്‍കിയതിന് നന്ദി അറിയിച്ചതാണെന്നാണ് മുഖ്യമന്ത്രി രാഹുലിനെ അറിയിച്ചത്. എന്നാല്‍ ഇതിന്റെ വീഡിയോ സമൂഹ മാധ്യമങ്ങളില്‍ പ്രചരിക്കാന്‍ തുടങ്ങിയതോടെ നാരായണ സ്വാമിക്ക് നേരെ രൂക്ഷ വിമര്‍ശനങ്ങളാണ് ഉയരുന്നത്.
