ന്യൂദല്‍ഹി: സച്ചിന് ടെണ്ടുല്‍ക്കര്‍ എന്ന ക്രിക്കറ്റ് ദൈവത്തെ ദേശീയവികാരമുണര്‍ത്തിയതിന്റെ പേരില്‍ പിച്ചിച്ചീന്തിയവര്‍ക്ക് ചുട്ടമറുപടി നല്‍കി ദേശം സച്ചിനൊപ്പം (നേഷന്‍ വിത്ത് സച്ചിന്) എന്ന പുതിയ ഹാഷ്ടാഗ് ട്വിറ്ററില്‍ തരംഗമാവുന്നു.
കഴിഞ്ഞ കുറച്ച് ദിവസമായി ഇസ്ലാമിക തീവ്രവാദികളും ഖാലിസ്ഥാന്‍ വാദികളും കമ്മ്യൂണിസ്റ്റുകളും മോദിവിരുദ്ധ ലിബറുലകളും കൂടി സച്ചിനെതിരെ അട്ടഹാസമായിരുന്നു. സച്ചിന് വിരുദ്ധട്വീറ്റുകളുടെ ഉറവിടം എവിടെ നിന്നാണെന്ന് ഏറെക്കുറെ കേന്ദ്ര ഇന്‍റലിജന്‍സിന് മനസ്സിലായി. ഇതോടെയാണ് ഒറ്റപ്പെട്ട സച്ചിനായി ദേശസ്നേഹികള്‍ പുതിയ ഹാഷ്ടാഗ് ട്വിറ്ററില്‍ ആരംഭിച്ചത്- ദേശം സച്ചിനൊപ്പം (നേഷന്‍ വിത്ത് സച്ചിന്).
ഗ്രെറ്റ തുന്‍ബര്‍ഗ് എന്ന സ്വീഡനിലെ പരിസ്ഥിതിവാദി കര്‍ഷകസമരം വിജയിപ്പിക്കുന്നതിനുള്ള ടൂള്‍കിറ്റിടുകയും റിഹാന എന്ന പോപ്പ് ഗായിക കര്‍ഷകസമരത്തെ പിന്തുണച്ച് സിഎന്‍എന്‍ വെബ്സൈറ്റില്‍ വന്ന ഒരു ലേഖനം ഷെയര്‍ ചെയ്യുകയും ചെയ്തതോടെയാണ് ഇന്ത്യക്കാരെ വിഭജിക്കരുതെന്ന നിര്‍ദേശവുമായി സച്ചിന് ഇന്ത്യടുഗെതര്‍ എന്ന വിദേശകാര്യമന്ത്രാലയം തുടങ്ങിവെച്ച ഹാഷ്ടാഗിനെ പിന്തുണച്ച് ട്വീറ്റ് ചെയ്തത്. ഇതിനെതിരെ മോദിവിരുദ്ധ ലോബിയുടെ അട്ടഹാസമായിരുന്നു പിന്നീടങ്ങോട്ട്.
മാസ്റ്റര്‍ ബ്ലാസ്റ്ററുടെ ആരാധകര്‍ ട്വിറ്ററില്‍ കൂട്ടത്തോടെ എത്തുകയാണ്. രാജ്യത്തിന് സമാനതകളില്ലാത്ത മഹത്വം കൊണ്ടുവന്ന ക്രിക്കറ്റ് താരമാണ് സച്ചിന്. കേരളത്തിലെ യൂത്ത് കോണ്‍ഗ്രസുകാര്‍ കരിഓയില്‍ ഒഴിച്ചാണ് ശനിയാഴ്ച സച്ചിനെതിരെ പ്രതികരിച്ചത്. സച്ചിന് തന്റെ ട്വീറ്റില്‍ കര്‍ഷകരെ വിമര്‍ശിച്ചിട്ടില്ല. സര്‍ക്കാരിനെയും കര്‍ഷകരെയും തമ്മിലടിപ്പിച്ച് ഇന്ത്യയെ വിഭജിക്കാന്‍ ശ്രമിക്കുന്നവരെ അതിനനുവദിക്കരുതെന്നും അതിന് ആക്കം കൂട്ടാന്‍ വിദേശ സെലിബ്രിറ്റികള്‍ ശ്രമിക്കരുതെന്നും ആയിരുന്നു സച്ചിന്റെ ട്വീറ്റിന് പിന്നിലെ ചോദന.
ഈ ഒരൊറ്റ ട്വീറ്റുകൊണ്ട് സച്ചിന് കമ്മ്യൂണിസ്റ്റുകളുടെയും യൂത്ത് കോണ്‍ഗ്രസുകാരുടെയും ഇസ്ലാമിക തീവ്രവാദികളുടെയും ഖാലിസ്ഥാനികളുടെയും കണ്ണില്‍ കരടായി. ഭാരത രത്‌ന നേടിയ, കറ പുരളാത്ത വ്യക്തിത്വമുള്ള സച്ചിനെതിരെ തന്റെ മകന്‍ അര്‍ജുന് മുംബൈ ഇന്ത്യന്‍സില്‍ ഇടം കിട്ടാനാണ് മോദിക്കും അംബാനിക്കും അനുകൂലമായി സച്ചിന് ട്വീറ്റ് ചെയ്തത് എന്ന് വരെ ബാലിശമായ വിമര്‍ശനങ്ങളുണ്ടായി. സ്വന്തക്കാര്‍ക്ക് വേണ്ടി തൊഴിലവസരങ്ങള്‍ തട്ടിയെടുക്കുന്ന കമ്മ്യൂണിസ്റ്റ്- കോണ്‍ഗ്രസ് നേതാക്കളുടെ പാരമ്പര്യത്തിലേക്ക് സച്ചിനെ ഇടിച്ചു താഴ്ത്തുകയായിരുന്നു സൈബര്‍ സഖാക്കള്‍ ഉള്‍പ്പെടെയുള്ള ഒരു കൂട്ടം മലയാളികള്‍. തന്റെ ക്രിക്കറ്റ് ജീവിതത്തില്‍ ഒരിക്കല്‍ പോലും സച്ചിന് കോഴയേയോ ഹവാല പണത്തെയോ എത്രയോ പ്രലോഭനങ്ങളുണ്ടായിട്ടുപോലും ഏഴയലത്ത് അടുപ്പിച്ചിട്ടില്ല. ആ സച്ചിനെയാണ് പ്രശാന്ത് ഭൂഷണെപ്പോലെയുള്ള മോദി വിരുദ്ധതകൊണ്ട് അന്ധനായ അഭിഭാഷകന്‍ കാരുണ്യമില്ലാത്തവനായി മുദ്രകുത്തിയത്. ‘ സര്‍ക്കാരിന്റെ ഹൃദയശൂന്യനായ സെലിബ്രിറ്റി’ എന്നായിരുന്നു പ്രശാന്ത് ഭൂഷണ്‍ സച്ചിനെതിരായി നടത്തിയ ട്വീറ്റ്. കേരളത്തിലെ ചിലര്‍ മരിയ ഷറപ്പോവയോട് മാപ്പ് ചോദിച്ച് വരെ സച്ചിനെ അപമാനിക്കാന്‍ ശ്രമിച്ചു. പണ്ട് സച്ചിനെക്കുറിച്ചുള്ള ഒരു കമന്‍റിന് സച്ചിനെ തനിക്കറിയില്ലെന്ന് പറഞ്ഞതിന് റഷ്യന്‍ ടെന്നീസ് താരം മരിയ ഷറപ്പോവയെ വിമര്‍ശിച്ച നാടാണ് ഇന്ത്യ. ആ ഇന്ത്യയിലെ ചില തല്‍പരകക്ഷികളാണ് ദുഷ്ടലാക്കോടെ ഇപ്പോള്‍ സച്ചിനെ ഇത്രത്തോളം തരംതാഴ്‌ത്തിയത്.
ഇതോടെയാണ് സച്ചിനെ ഒറ്റപ്പെടുത്തരുതെന്ന വാശിയില്‍ ദേശം സച്ചിനൊപ്പം (നേഷന്‍ വിത്ത് സച്ചിന്) എന്ന ഹാഷ് ടാഗ് തുടങ്ങിയത്. ഇപ്പോള്‍ ട്വിറ്ററില്‍ വലിയ ട്രെന്‍ഡായി മാറിയിരിക്കുകയാണ് ഈ ഹാഷ് ടാഗ്. തരം താഴ്ന്നത് സച്ചിനല്ല, അദ്ദേഹത്തെ തരംതാഴ്‌ത്താന്‍ ശ്രമിച്ചവര്‍ തന്നെയാണെന്നാണ് ട്വിറ്ററില്‍ സച്ചിന് ലഭിക്കുന്ന കലവറയില്ലാത്ത പിന്തുണ തെളിയിക്കുന്നത്. ട്വിറ്ററില്‍ ലോകത്തിലെ തന്നെ ട്രെന്‍റ് ചെയ്യുന്ന കായികബിംബമായി സച്ചിന് ഈ ഹാഷ് ടാഗിലൂടെ മാറുകയാണ്.
