ചേര്‍ത്തല: തദ്ദേശ സ്വയംഭരണ തെരഞ്ഞെടുപ്പിനായുള്ള മുന്നൊരുക്കങ്ങള്‍ വേഗത്തിലാക്കാന്‍ ബിഡിജെഎസ് സംസ്ഥാന കൗണ്‍സില്‍ യോഗം തീരുമാനിച്ചു. കഴിഞ്ഞ നിയമസഭ തെരഞ്ഞെടുപ്പില്‍ 35 ശതമാനം സീറ്റിലാണ് പാര്‍ട്ടി മത്സരിച്ചത്. ഇത്തവണ എന്‍ഡിഎ മുന്നണിയില്‍ 40 ശതമാനം സീറ്റില്‍ മത്സരിക്കുമെന്നും ശക്തമായി മുന്നണിയില്‍ തുടരുമെന്നും സംസ്ഥാന പ്രസിഡന്റ് തുഷാര്‍ വെള്ളാപ്പള്ളി പറഞ്ഞു.
28 ന് എറണാകുളത്ത് നടക്കുന്ന എന്‍ഡിഎ സംസ്ഥാന നേതൃയോഗത്തിന് ശേഷം ഇതുസംബന്ധിച്ച് അന്തിമ തീരുമാനമെടുക്കും. ബൂത്ത് തലം മുതല്‍ പ്രവര്‍ത്തനം ശക്തമാക്കി ജൂലൈ 30 ന് മുന്‍പ് സ്ഥാനാര്‍ഥികളെ നിശ്ചയിക്കും. നിര്‍ജീവമായ ഭാരവാഹികളെ ഒഴിവാക്കി കമ്മിറ്റികള്‍ 25 ന് മുന്‍പ് പുന:സംഘടിപ്പിക്കാനും തീരുമാനമായിട്ടുണ്ട്.
ബിഡിജെഎസ് സംസ്ഥാന ജനറല്‍സെക്രട്ടറിയായിരുന്ന ടി.വി. ബാബുവിന്റെ കുടുംബത്തിന് വേണ്ട സഹായങ്ങള്‍ ചെയ്യും. ഭാരവാഹികളായ അരയക്കണ്ടി സന്തോഷ്, എ.ജി തങ്കപ്പന്‍, ആര്‍. പത്മകുമാര്‍, വി. ഗോപകുമാര്‍, പച്ചയില്‍ സന്ദീപ്, തഴവ സഹദേവന്‍, രാജേഷ് നെടുമങ്ങാട്, സംഗീത വിശ്വനാഥന്‍ തുടങ്ങിയവര്‍ പങ്കെടുത്തു.
