മുക്കം: വാട്സ്ആപ്പ് ഗ്രൂപ്പില് അശ്ലീല ചിത്രം പ്രചരിപ്പിച്ചെന്ന പരാതിയില് സിപിഎം നേതാവ് ഗ്രാമപഞ്ചായത്ത് വൈസ് പ്രസിഡന്റ് സ്ഥാനം രാജിവെച്ചു. കൂടരഞ്ഞി ഗ്രാമപഞ്ചായത്ത് വൈസ് പ്രസിഡന്റ് തോമസ് മാത്യുവാണ് രാജിവെച്ചത്.
ഇന്നലെ രാവിലെ സിപിഎം ലോക്കല് സെക്രട്ടറി ജലീല് കൂടരഞ്ഞിക്കൊപ്പമെത്തി പഞ്ചായത്ത് സെക്രട്ടറി ബ്രതീഷിന് രാജി നല്കുകയായിരുന്നു.
മെയ് ഒന്നിനാണ് സ്ത്രീകള് ഉള്പ്പെടെ നിരവധി പേര് അംഗങ്ങളായ വാട്സ്ആപ്പ് ഗ്രൂപ്പിലേക്ക് തോമസ് മാത്യു അശ്ലീല ചിത്രം അയച്ചത്. സംഭവം പുറത്തായതോടെ തോമസ് മാത്യുവിനെതിരെ നടപടിയാവശ്യപ്പെട്ട് ഡിജിപി ഉള്പ്പെടെയുള്ളവര്ക്ക് പരാതി നല്കിയിരുന്നു.
തുടര്ന്ന് തിരുവമ്പാടി പോലീസ് കഴിഞ്ഞ ദിവസം ഐടി ആക്ട് പ്രകാരം കേസെടുത്തു. ഇതേ തുടര്ന്നാണ് രാജിയെന്നാണ് പറയുന്നത്.
താന് ടോയ്ലറ്റില് പോയ സമയത്ത് തന്നെ മനഃപൂര്വം അപമാനിക്കാനായി മറ്റാരോ ചെയ്തതെന്നാണ് തോമസ് മാത്യുവിന്റെ വിശദീകരണം. തോമസ് മാത്യുവിന്റെ രാജിയാവശ്യപ്പെട്ട് വിവിധ യുവജനസംഘടനകള് പ്രതിഷേധരംഗത്തുണ്ടായിരുന്നു.
