ശ്രീനഗര്‍: കഴിഞ്ഞ ഞായറാഴ്ച പാക് അധീന കശ്മീരിലെ നീലം താഴ്‌വരയില്‍ സൈന്യം നടത്തിയ പ്രത്യാക്രമണത്തിന്റെ വിവരങ്ങള്‍ പുറത്തുവിട്ട് അധികൃതര്‍. പാകിസ്ഥാനില്‍ ഭീകരരുടെ ലോഞ്ച് പാഡുകളിലേക്ക് ഇന്ത്യന്‍ സൈന്യം നടത്തിയ ആക്രമണത്തില്‍ 18 ഭീകരര്‍ കൊല്ലപ്പെട്ടതായി റിപ്പോര്‍ട്ടുകള്‍. ജെയ്‌ഷെ മുഹമ്മദ്, ലഷ്‌കര്‍ ഇ തൊയ്ബ ഉള്‍പ്പെടെയുള്ള ഭീകരരെ പാര്‍പ്പിച്ചിരുന്ന നാലു ലോഞ്ച് പാഡുകള്‍ പൂര്‍ണമായും തകര്‍ക്കാന്‍ കഴിഞ്ഞുവെന്ന് സൈന്യം വ്യക്തമാക്കി.
തങ്ധര്‍ മേഖലയില്‍ ഭീകരരെ നുഴഞ്ഞുകയറാന്‍ സഹായിക്കുന്നതിനായി പാകിസ്ഥാന്‍ സൈന്യം നടത്തിയ ആക്രമണത്തില്‍ രണ്ട് സൈനികര്‍ വീരമൃത്യു വരിച്ചത്തിനെ തുടര്‍ന്നായിരുന്നു ഭാരതത്തിന്റെ പ്രത്യാക്രമണം. പീരങ്കികള്‍ ഉപയോഗിച്ച നടത്തിയ ആക്രമണത്തില്‍ നീലം താഴ്‌വരയിലെ ജുറ, അദ്മുകം, കുണ്ഡല്‍സഹി മേഖലകളില്‍ പ്രവര്‍ത്തിച്ചിരുന്ന ഭീകര ക്യാമ്പുകളാണ് ഇന്ത്യ തകര്‍ത്തത്.
ഭാരതത്തിലെക്ക് നുഴഞ്ഞുകയറാന്‍ ഭീകരവാദികള്‍ക്ക് പാക് സൈന്യം പിന്തുണ നല്‍കുന്നതായി തെളിവുകള്‍ ലഭിച്ചതിനെതുടര്‍ന്നാണ് തിരിച്ചടി. സൈന്യത്തിന്റെ പ്രത്യാക്രമണത്തിന് ശേഷം സ്ഥിഗതികള്‍ വിശദീകരിക്കാനായി കരസേനാ മേധാവി ബിപിന്‍ റാവത്ത് കേന്ദ്ര പ്രതിരോധമന്ത്രി രാജ്‌നാഥ് സിങ്ങുമായി രണ്ടു തവണ കൂടിക്കാഴ്ച നടത്തി.
