ന്യൂദല്ഹി: അയോധ്യാ കേസിലെ അന്തിമവാദം വേഗത്തില് കേള്ക്കുന്നതിനെ എതിര്ത്ത് മുസ്ലിം സംഘടനകള്. കേസിന്റെ വാദം എല്ലാ ദിവസവും നടത്തരുതെന്നും ഇത്ര വേഗത്തിന്റെ ആവശ്യമില്ലെന്നും മുസ്ലിം സംഘടനകളുടെ അഭിഭാഷകനായ രാജീവ് ധവാന് ഭരണഘടനാ ബെഞ്ചിനോട് ആവശ്യപ്പെട്ടു.
കേസ് നീട്ടിക്കൊണ്ടുപോകാന് പലവിധത്തില് ശ്രമിച്ച മുസ്ലിം സംഘടനകള് അന്തിമവാദത്തിലും ആ തന്ത്രം ആവര്ത്തിക്കുകയാണ്. എന്നാല് കേസിലെ വാദം എല്ലാ ദിവസവും തുടരുമെന്നും രാജീവ് ധവാന് വാദിക്കേണ്ട ദിവസങ്ങള്ക്ക് വേണമെങ്കില് ഒഴിവു നല്കാമെന്നും കോടതി വ്യക്തമാക്കി.
കോടതിയോട് അത്യന്തം മോശമായ പെരുമാറ്റമാണ് രാജീവ് ധവാന്റെ ഭാഗത്തുനിന്നുണ്ടായത്. എല്ലാ ദിവസവും കേസ് പരിഗണിക്കുകയാണെങ്കില് കേസില് വാദിക്കാനില്ലെന്ന് ധവാന് പറഞ്ഞു. ജസ്റ്റിസ് ചന്ദ്രചൂഡ് ഒഴികെ മറ്റു ജഡ്ജിമാരാരും അലഹബാദ് ഹൈക്കോടതി വിധി വായിച്ചിട്ടു പോലുമില്ലാത്തവരാണെന്നും ധവാന് അധിക്ഷേപിച്ചു. നേരത്തെ ചീഫ് ജസ്റ്റിസ് ദീപക് മിശ്രയെ അധിക്ഷേപിച്ച് ഇനി സുപ്രീംകോടതിയിലേക്കില്ലെന്ന് പറഞ്ഞിറങ്ങിയ ധവാന് ഒരാഴ്ചയ്ക്ക് ശേഷം മാപ്പപേക്ഷ നല്കി തിരികെ എത്തുകയായിരുന്നു.
കേസില് രാംലാലയ്ക്ക് വേണ്ടി മുതിര്ന്ന അഭിഭാഷകന് കെ. പരാശരന്റെ വാദം തുടരുകയാണ്. ചൊവ്വാഴ്ച ആരംഭിച്ച അയോധ്യാ കേസിന്റെ വാദം നാലു ദിവസം പൂര്ത്തിയായി. ഇനി തിങ്കളാഴ്ച വാദം പുനരാരംഭിക്കും.
