വാഷിങ്ടണ്: കശ്മീര് കേന്ദ്ര ഭരണ പ്രദേശമാക്കിയുള്ള പുനസംഘടനയില് ഇന്ത്യയും പാക്കിസ്ഥാനും സംയമനം പാലിക്കണമെന്ന് അമേരിക്ക. ഭീകരര് ഇന്ത്യന് അതിര്ത്തിയിലേക്ക് നുഴഞ്ഞുകയറാന് അവസരം ഒരുക്കരുതെന്നും ഈ സംഘടനകള്ക്കെതിരെ കര്ശ്ശന നടപടി സ്വീകരിക്കണമെന്നും യുഎസ് മുന്നറിയിപ്പ് നല്കി.
ജമ്മു കശ്മീരില് പുല്വാമ മാതൃകയില് ഭീകരാക്രമണത്തിന് സാധ്യതയുണ്ടെന്ന ഇന്റലിജെന്സ് റിപ്പോര്ട്ടുകള് പുറത്തുവന്നിരുന്നു. കൂടാതെ നുഴഞ്ഞു കയറാന് ശ്രമിച്ച പാക് സൈനിക വിഭാഗമായ ബാറ്റിലെ നാലുപേരെ ഇന്ത്യന് സൈന്യം കഴിഞ്ഞ ജൂലൈ 31ന് വധിച്ചിരുന്നു. ഇതിന്റെ അടിസ്ഥാനത്തിലാണ് യുഎസിന്റെ ഈ പ്രസ്താവന.
ജമ്മു കശ്മീര് വിഷയത്തില് ഇത് രണ്ടാം തവണയാണ് അമേരിക്ക പ്രസ്താവനയുമായി രംഗതെത്തുന്നത്. അതേസമയം ആര്ട്ടിക്കിള് 370 റദ്ദാക്കുന്നതുമായി ബന്ധപ്പെട്ട് വിവരങ്ങള് മുന്കൂട്ടി ഇന്ത്യ അറിയിച്ചിരുന്നുവെന്ന വാര്ത്തകള് യുഎസ് സ്റ്റേറ്റ് ഡിപ്പാര്ട്മെന്റ് തള്ളി.
ബാങ്കോക്കില് നടന്ന കിഴക്കന് ഏഷ്യന് ഉച്ചകോടിക്കിടെ വിദേശകാര്യ മന്ത്രി എസ്. ജയശങ്കര് അമേരിക്കന് സ്റ്റേറ്റ് സെക്രട്ടറി മൈക് പോംപിയോയ്ക്ക് ഇതുസംബന്ധിച്ച വിവരങ്ങള് നല്കിയിരുന്നുവെന്ന് ചില മാധ്യമങ്ങളില് വാര്ത്തകള് വന്നിരുന്നു. പുല്വാമ ഭീകരാക്രമണത്തിന് പിന്നാലെ ദേശീയ സുരക്ഷാ ഉപദേഷ്ടാവ് അജിത് ഡോവല് അമേരിക്കയിലെ സുരക്ഷാ ഉപദേഷ്ടാവ് ജോണ് ബോള്ടണുമായി ഇക്കാര്യം സംസാരിച്ചിരുന്നുവെന്നും വാര്ത്തകള് പുറത്തുവന്നിരുന്നു. എന്നാല് ഈ വാര്ത്തകളെല്ലാം കെട്ടിച്ചമച്ചവയാണെന്നും ഔദ്യോഗിക വൃത്തങ്ങള് അറിയിച്ചു.
