മുംബൈ: ജസ്പ്രീത് ബുംറയുടെ ബൗളിങ്ങ് മികവില്‍ സണ്‍റൈസേഴ്‌സ് ഹൈദരാബാദിനെതിരെ വിജയം നേടിയ മുംബൈ ഇന്ത്യന്‍സ് ഐപിഎല്ലില്‍ പ്ലേ ഓഫ് ഉറപ്പിച്ചു. സൂപ്പര്‍ ഓവറിലേക്ക് നീങ്ങിയ മത്സരത്തില്‍ മൂന്ന് പന്ത് ശേഷിക്കെ ഹാര്‍ദിക് പാണ്ഡ്യ-പൊള്ളാര്‍ഡ് സഖ്യം ടീമിനെ വിജയത്തിലെത്തിക്കുകയായിരുന്നു. ഇതോടെ മുംബൈക്ക് പതിമൂന്ന് മത്സരങ്ങളില്‍നിന്ന് പതിനാറു പോയിന്റായി.
ഹൈദരാബാദിന്റെ മുന്‍നിരയെ തകര്‍ത്ത ബുംറ നാലോവറില്‍ 31 റണ്‍സിന് രണ്ട് വിക്കറ്റ് വീഴ്‌ത്തി. സൂപ്പര്‍ ഓവറിലും പന്തെറിയാനെത്തിയ ബുംറ മുഹമ്മദ് നബിയെയും മനീഷ് പാണ്ഡെയെയും പുറത്താക്കിയതോടെയാണ് ഹൈദരാബാദ് സ്‌കോര്‍ എട്ടു റണ്‍സില്‍ ഒതുങ്ങിയത്. ഒമ്പത് റണ്‍സ് വിജയലക്ഷ്യയവുമായി കളത്തിലിറങ്ങിയ മുംബൈയെ പാണ്ഡ്യ-പൊള്ളാര്‍ഡ് സഖ്യം മൂന്ന് പന്ത് ശേഷിക്കെ വിജയത്തിലെത്തിച്ചു.
നേരത്തെ ഇരു ടീമുകളും ഇരുപതോവറില്‍ 162 റണ്‍സ് നേടിയതോടെയാണ് മത്സരം സൂപ്പര്‍ ഓവറിലേക്ക് നീങ്ങിയത്. 163 റണ്‍സ് വിജയലക്ഷ്യവുമായി കളത്തിലിറങ്ങിയ ഹൈദരാബാദ് അവസാന പന്തില്‍ സിക്‌സ് നേടി സ്‌കോര്‍ ഒപ്പമെത്തിക്കുകയായിരുന്നു. മനീഷ് പാണ്ഡെയുടെ അര്‍ധസെഞ്ചുറി ബലത്തിലാണ് ഹൈദരാബാദ് സ്‌കോര്‍ മുന്നോട്ടു നീങ്ങിയത്. പാണ്ഡെ 47 പന്തില്‍ രണ്ട് സിക്‌സും എട്ട് ഫോറും സഹിതം 71 റണ്‍സ് നേടി പുറത്താകാതെ നിന്നു. ഹൈദരാബാദിന് മികച്ച തുടക്കം നല്‍കിയ വൃദ്ധിമാന്‍ സാഹ പതിനഞ്ച് പന്തില്‍ അഞ്ച് ഫോറോടെ 25 റണ്‍സ് നേടി. നായകന്‍ കെയ്ന്‍ വില്യംസണ്‍ (മൂന്ന്), മാര്‍ട്ടിന്‍ ഗുപ്റ്റില്‍ (15), വിജയ് ശങ്കര്‍ (12) എന്നിവര്‍ പെട്ടെന്ന് പുറത്തായി. അവസാന ഓവറുകളില്‍ മനീഷ് പാണ്ഡെയ്‌ക്കൊപ്പം മുഹമ്മദ് നബി ആഞ്ഞടിച്ചതോടെ സ്‌കോര്‍ ഇരുപതോവറില്‍ ആറു വിക്കറ്റ് നഷ്ടത്തില്‍ 162 റണ്‍സില്‍ എത്തുകയായിരുന്നു. മുംബൈക്കായി ബുംറ, ഹാര്‍ദിക് പാണ്ഡ്യ, ക്രുണാല്‍ പാണ്ഡ്യ എന്നിവര്‍ രണ്ട് വിക്കറ്റ് വീതം വീഴ്‌ത്തി.
നേരത്തെ ടോസ് നേടി ആദ്യം ബാറ്റിങ്ങ് തെരഞ്ഞെടുത്ത മുംബൈ ഓപ്പണര്‍ ക്വിന്റണ്‍ ഡി കോക്കിന്റെ അര്‍ധസെഞ്ചുറി ബലത്തില്‍ ഇരുപതോവറില്‍ അഞ്ച് വിക്കറ്റ് നഷ്ടത്തില്‍ 162 റണ്‍സ് നേടി. ഡി കോക്ക് 58 പന്തില്‍ രണ്ട് സിക്‌സും ആറു ഫോറും സഹിതം 69 റണ്‍സ് നേടി പുറത്താകാതെനിന്നു
