കൊച്ചി: മൂന്നു വര്ഷത്തിനകം, പുനരുപയോഗിക്കാന് കഴിയാത്ത പ്ലാസ്റ്റിക് ഉപയോഗം ഇല്ലാതാക്കുമെന്ന് കേന്ദ്ര കേന്ദ്ര ശാസ്ത്ര, സാങ്കേതിക, ഭൗമശാസ്ത്ര മന്ത്രി ഡോ. ഹര്ഷ് വര്ധന് പറഞ്ഞു. പരിസ്ഥിതി സംരക്ഷണത്തിനായി കേന്ദ്ര സര്ക്കാര് ആവിഷ്ക്കരിച്ച ‘ഗ്രീന് ഗുഡ് ഡീഡ്സ്’ പദ്ധതി ജനകീയ മുന്നേറ്റമാക്കണമെന്നും അതിന് ശാസ്ത്രലോകം സഹായക കണ്ടുപിടിത്തങ്ങള് നടത്തണമെന്നും അദ്ദേഹം പറഞ്ഞു.
സമുദ്ര ഗവേഷണ രംഗത്തെ കേന്ദ്ര സര്ക്കാര് സ്ഥാപനമായ സെന്റര് ഫോര് മറൈന് ലിവിങ് റിസോഴ്സസ് ആന്ഡ് ഇക്കോളജിയുടെ (സിഎംഎല്ആര്ഇ) അടല് ഭവന് എന്ന പുതിയ കെട്ടിടവും കാമ്പസും പുതുവൈപ്പില് ഉദ്ഘാടനം ചെയ്യുകയായിരുന്നു മന്ത്രി.
ശാസ്ത്ര, സാങ്കേതിക മേഖലയിലെ നേട്ടത്തിലൂടെ ഇന്ത്യ ആദ്യ മൂന്ന് ലോകരാജ്യങ്ങളിലൊന്നായി. ജയ്ജവാനും ജയ് കിസാനുമൊപ്പെം ജയ് വിജ്ഞാന് എന്ന മുദ്രാവാക്യം ചേര്ത്ത അടല് ബിഹാരി വാജ്പേയിയുടെ നേതൃത്വത്തില് അണുസ്ഫോടനം വരെ നടത്തി ഇന്ത്യ ശാസ്ത്ര നേട്ടത്തില് കുതിച്ചു. ജയ് അനുസന്ധാന് എന്ന വാക്യവും ചേര്ത്ത് പ്രധാനമന്ത്രി നരേന്ദ്ര മോദി സര്ക്കാര് ശാസ്ത്ര ലോകത്ത് വന് നേട്ടമാണ് ഉണ്ടാക്കിയത്.
യുഎന് പരിസ്ഥിതി അവാര്ഡ് മോദിക്കാണ് നല്കിയത്. 1974 മുതല് ഈ അവാര്ഡ് കൊടുക്കുന്നെങ്കിലും ഇത്ര അര്ധവത്തായ പ്രവര്ത്തനം ഇന്ത്യയില് മാത്രമാണെന്ന് യുഎന് തലവന് അന്റോണിയോ ഗുട്ടറസ് പറഞ്ഞു. പരിസ്ഥിതി കാര്യത്തില് നിശ്ചയിച്ച കാലത്തിനു മുമ്പ് ലക്ഷ്യങ്ങള് കൈവരിച്ചു. ഇത് ശാസ്ത്രലോകത്തിന്റെ നേട്ടമാണ്, മന്ത്രി മാധ്യമങ്ങളോട് സംസാരിക്കവേ പറഞ്ഞു.
കൃഷി, മത്സ്യബന്ധനം, കാലാവസ്ഥാ പ്രവചനം, ബഹിരാകാശ ഗവേഷണം, ഗ്രാമീണ സാമ്പത്തിക വികസനം, ജല സംരക്ഷണം തുടങ്ങി സമസ്ത മേഖലയിലും ശാസ്ത്രീയമായി ഇന്ത്യ കുതിപ്പിലാണ്. സമുദ്ര ജലം ശുദ്ധജലമാക്കുന്ന വന് പദ്ധതികള് ആറെണ്ണം ഉദ്ഘാടനത്തിനൊരുങ്ങി. ശാസ്ത്ര മേഖലയില് എന്ത് വികസന പ്രവര്ത്തനത്തിനും സര്ക്കാര് സഹായിക്കുമെന്നും അതിന് സമ്പത്തിന്റെ കുറവു വരില്ലെന്നും മന്ത്രി പറഞ്ഞു.
പുതുവൈപ്പ് എല്എന്ജി റോഡില് 10 ഏക്കര് സ്ഥലത്ത് 40 കോടി രൂപ ചെലവിലാണ് സിഎംഎല്ആര്ഇയുടെ പുതിയ കാമ്പസ്. സിഎംഎല്ആര്ഇയുടെ പുതിയ വെബ്സൈറ്റും ചടങ്ങില് ഡോ. ഹര്ഷ് വര്ധന് ഉദ്ഘാടനം ചെയ്തു. പുതിയ സിഎംഎല്ആര്ഇ കാമ്പസിനെ കുറിച്ചുള്ള പ്രത്യേക സ്മരണിക സ്റ്റാമ്പിന്റെ പ്രകാശനവും ചടങ്ങില് നടന്നു.
‘ടാക്സോണമിക് ഡിസ്കവറീസ് ഫ്രം നോര്ത്തേണ് ഇന്ത്യന് ഓഷ്യന്’ എന്ന പുസ്തകം എസ്. ശര്മ എംഎല്എ ഡോ. ഹര്ഷ് വര്ധന് നല്കി നിര്വഹിച്ചു. പ്രത്യേക തപാല് സ്റ്റാമ്പ് തപാല് വകുപ്പ് കേരള സര്ക്കിള് ചീഫ് പോസ്റ്റ് മാസ്റ്റര് ജനറല് ശാരദ സമ്പത്ത് മന്ത്രിക്കു നല്കി പ്രകാശനം ചെയ്തു. കേന്ദ്ര ഭൗമശാസ്ത്ര മന്ത്രാലയം സെക്രട്ടറി ഡോ.എം. രാജീവന്, സിഎംഎല്ആര്ഇ ഡയറക്ടര് ഡോ.എം. സുധാകര്, സയന്റിസ്റ്റ്-എഫ് ഡോ. എ. ശിവജി എന്നിവരും പങ്കെടുത്തു.
വനവാസികളെ ഒഴിപ്പിക്കല് അനുകമ്പാപൂര്വം
കൊച്ചി: വനത്തില്നിന്ന് അനധികൃത താമസക്കാരായ വനവാസികളെ ഒഴിപ്പിക്കുന്ന കാര്യത്തില് അനുകമ്പാപൂര്ണമായ നിലപാടായിരിക്കും കേന്ദ്ര സര്ക്കാരിനെന്ന് േകന്ദ്ര വനം മന്ത്രി ഡോ. ഹര്ഷ് വര്ധന്. വനത്തിലെ അനധികൃത താമസക്കാരെ ഒഴിപ്പിക്കണമെന്ന കോടതി വിധിയോട് പ്രതികരിക്കുകയായിരുന്നു അദ്ദേഹം. കോടതിയുടെ നിര്ദേശം പൂര്ണമായും വായിച്ചറിഞ്ഞ ശേഷമേ സര്ക്കാര് തീരുമാനിക്കൂ. കൊല്ലം ആലപ്പാട്ട് ഇന്ത്യന് റെയര് എര്ത്ത് നടത്തുന്ന കരിമണല് ഖനനം പ്രദേശത്തെ ഇല്ലാതാക്കുന്ന കാര്യത്തില് പരാതി കിട്ടിയാല് അന്വേഷണം നടത്താമെന്ന് മന്ത്രി പറഞ്ഞു.
