കൊല്ലം: ഉത്സവ കാലമായതോടെ തിരുവിതാംകൂറിന്റെ ഗജരാജന്‍ തൃക്കടവൂര്‍ ശിവരാജുവിന് മതിയായ വിശ്രമം നല്‍കാത്ത ദേവസ്വം ബോര്‍ഡ് നടപടിക്ക് എതിരെ ആനപ്രേമികളും ഭക്തരും രംഗത്ത്.
ആവശ്യമായ ഇടവേളപോലും അനുവദിക്കാതെയാണ് വിവിധ ഇടങ്ങളിലേക്ക് ആനയെ രാപകല്‍ ഭേദമില്ലാത്തെ വലയ്‌ക്കുന്നത്. വടക്കും തെക്കുമുള്ള ക്ഷേത്രങ്ങളില്‍ എഴുന്നള്ളത്തിന് എത്തുന്ന ശിവരാജുവിന് മതിയായ വിശ്രമം നല്‍കിയില്ലങ്കില്‍ ആനയ്‌ക്ക് ആരോഗ്യപ്രശ്‌നങ്ങള്‍ ഉണ്ടാകുമെന്നും നാട്ടുകാര്‍ ചൂണ്ടിക്കാട്ടുന്നു. എഴുന്നള്ളത്തിന് ഒരു ലക്ഷം രൂപ ഏക്കത്തുകയുള്ള ശിവരാജുവിനെ ഇത്തവണ മൂന്ന് ലക്ഷം രൂപയില്‍ കൂടുതല്‍ നല്‍കി എഴുന്നള്ളത്തിനായി ലേലം പിടിച്ച പൂര കമ്മിറ്റികളുമുണ്ട്.
ശിവരാജുവിന്റെ ഒരു വര്‍ഷത്തെ എഴുന്നള്ളത്ത് വരുമാനം വെളിപ്പെടുത്താന്‍ ദേവസ്വംബോര്‍ഡ് തയാറാകുന്നതുമില്ല. അതേ സമയം ദേവസ്വംബോര്‍ഡിന്റെ പ്രധാന വരുമാനമാര്‍ഗമായ ശിവരാജുവിന് ഇതുവരെ യാതൊരു ആദരവും അംഗീകാരവും നല്‍കിയിട്ടില്ലന്നും ആനപ്രേമികള്‍ പറയുന്നു. ഇന്ന് കേരളത്തിലുള്ള നാട്ടാനകളില്‍ മുമ്പില്‍ നില്‍ക്കുന്ന ശിവരാജു തെക്കന്‍ കേരളത്തിലെ തലയെടുപ്പുള്ള ആനകളില്‍ ഒന്നാമനാണ്. മാതംഗ ശാസ്ത്രം പറയുന്ന എല്ലാ ലക്ഷണങ്ങളും ശിവരാജുവിനുണ്ട്.
തിരുവിതാംകൂര്‍ ദേവസ്വം ബോര്‍ഡിന്റെ ഉടമസ്ഥതയിലുള്ള തൃക്കടവൂര്‍ മഹാദേവര്‍ക്ഷേത്രത്തിലെ ആനയാണ് ശിവരാജു. ഉയരത്തില്‍ ഒന്നാം സ്ഥാനം അലങ്കരിക്കുന്ന ശിവരാജുവിനായി ഉത്സവ സംഘാടകരും ആനേപ്രമികളും തങ്ങളുടെ ക്ഷേത്രങ്ങളിലും പൂരങ്ങളിലും എഴുന്നള്ളിപ്പിക്കാന്‍ മത്സരിക്കുകയാണ്. ഈ അവസരം മുതലെടുത്ത് ശിവരാജുവിനെ കൂടുതല്‍ എഴുന്നള്ളത്തുകളില്‍ ഉപയോഗിക്കാനാണ് ദേവസ്വം ബോര്‍ഡിന്റെ തീരുമാനം. തൃശ്ശുര്‍, പാലക്കാട് ജില്ലകളിലെ പൂരങ്ങളിലെ നിറസാന്നിധ്യമായ ശിവരാജുവിന് ഒന്നിടവിട്ട് വിശ്രമം അനുവദിക്കണമെന്നാണ് ആവശ്യം.
