പത്തനംതിട്ട: ശബരിമലയുമായി ബന്ധപ്പെട്ട പുനഃപരിശോധന ഹര്‍ജിയുടെ തീരുമാനംവരെ കാത്തിരിക്കാതെ കലാപം സൃഷ്ടിക്കാനാണ് പലരുടേയും ശ്രമമെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍. ഒരു സ്ത്രീയെ പോലും സര്‍ക്കാരോ സിപിഎമ്മോ ശബരിമലയിലെത്തിച്ചിട്ടില്ല.
നൂറുകണക്കിന് സ്ത്രീകളെ ശബരിമലയിലെത്തിക്കാനുള്ള സംഘടനാബലം പാര്‍ട്ടിക്കുണ്ടായിരുന്നു. എന്നാല്‍, അതിനു ശ്രമിച്ചില്ല. വിധി എന്തായാലും നടപ്പാക്കുകയെന്നത് സര്‍ക്കാരിന്റെ നയമാണ്. ശബരിമല യുവതീ പ്രവേശനം ആകാമെന്നതാണ് ഇടതു സര്‍ക്കാരിന്റെ നിലപാട്. ഇതിനനുസൃതമായ വിധിയാണ് ഉണ്ടായതെന്നതിനാലാണ് സര്‍ക്കാര്‍ പുനഃപരിശോധന ഹര്‍ജി നല്‍കാതിരുന്നതെന്നും കോടിയേരിവാര്‍ത്താസമ്മേളനത്തില്‍ പറഞ്ഞു.
