തൃശൂര് : എടക്കുളത്ത് വിവാഹ വീട്ടില് നിന്ന് മടങ്ങുന്നതിനിടെ മര്ദ്ദനമേറ്റ് ചികിത്സയിലായിരുന്ന യുവാവ് മരിച്ച സംഭവത്തില് ആറു പേര്ക്കെതിരെ പോലീസ് കേസെടുത്തു. പൊറുത്തിശ്ശേരി സ്വദേശി ബിബിന് ചന്ദ്രബാബു ആണ് മരിച്ചത്. എടക്കുളം സ്വദേശികളായ ആറുപേര്ക്കെതിരെയാണ് കാട്ടൂര് പൊലീസ് കേസെടുത്തിരിക്കുന്നത്.
സംഭവത്തെ തുടര്ന്ന് ഗുരുതരമായി പരിക്കേറ്റ 32 കാരനായ ബിബിന് തൃശ്ശൂര് സ്വകാര്യ ആശുപത്രിയില് ചികിത്സയിലായിരുന്നു. തലയില് ഗുരുതരമായി പരിക്കേറ്റതാണ് മരണകാരണം. പ്രതിപ്പട്ടികയില് ഉള്പ്പെട്ടിട്ടുള്ള ആറ് പ്രതികളും ഒളിവിലാണ്.
വ്യാഴാഴ്ച വൈകീട്ട് മൂന്ന് മണിക്ക് ബാറിനു മുന്നില് ബിബിനും മറ്റൊരു സംഘവും തമ്മില് വാക്കേറ്റവും കയ്യാങ്കളിയുണ്ടായിരുന്നു. ഇതിന്റെ സിസിടിവി ദൃശ്യങ്ങള് പൊലീസ് പരിശോധിച്ചു വരികയാണ്. ഇരുചക്രവാഹനത്തിലെത്തിയ ബിബിനെ യാതൊരു പ്രകോപനവും കൂടാതെ കുറച്ചു ആളുകള് വളഞ്ഞിട്ട് മര്ദ്ദിക്കുന്നതിന്റെ ദൃശ്യങ്ങളാണ് ഇതില് ഉളളത്. ഇതിന്റെ തുടര്ച്ചയായാണോ വെള്ളിയാഴ്ച രാത്രി ബിബിന് നേരെയുണ്ടായ ആക്രമണമെന്നും പോലീസ് അന്വേഷിക്കുന്നുണ്ട്. പ്രതികള്ക്ക് ഏറെ നാളായി ബിബിനോട് വൈരാഗ്യമുണ്ടായിരുന്നുവെന്നും അന്വേഷണത്തില് കണ്ടെത്തിയിട്ടുണ്ട്.
