ജോധ്പൂര്: പാക് അധീന കാശ്മീരില് കടന്ന് ഭീകരരുടെ താളങ്ങള് തകര്ത്ത സര്ജിക്കല് സ്ട്രൈക്കിന്റെ രണ്ടാം വാർഷികാഘോഷത്തോടനുബന്ധിച്ച് ഇന്ത്യൻ സൈന്യം നടത്തുന്ന പരാക്രം പർവ് സൈനിക പ്രദർശനം പ്രധാനമന്ത്രി നരേന്ദ്രമോദി ഉദ്ഘാടനം ചെയ്തു. ജോധ്പ്പുരിലെ സൈനിക സ്റ്റേഷനിലെത്തിയ മോദി കൊണാർക്ക് യുദ്ധ സ്മാരകത്തിൽ പുഷ്പചക്രം സമർപ്പിച്ചു. പ്രതിരോധമന്ത്രി നിർമ്മല സീതാരാമൻ,കര,നാവിക,വ്യോമസേന തലവന്മാർ എന്നിവരും അദ്ദേഹത്തെ അനുഗമിച്ചു.
ആഘോഷത്തിന്റെ ഭാഗമായി ആക്രമണത്തിന്റെ പുതിയ വീഡിയോയും സര്ക്കാര് പുറത്ത് വിട്ടിട്ടുണ്ട്. പൈലറ്റില്ലാ വിമാനത്തില് നിന്ന് തെര്മല് ഇമേജിങ്ങിലൂടെ കരസേന എടുത്തയാണ് ഈ ദൃശ്യങ്ങള്. മിന്നലാക്രമണത്തിന്റെ വിജയം മൂന്ന് ദിവസങ്ങളായാണ് ആഘോഷിക്കുന്നത്.
2016 സെപ്റ്റംബര് 28ന് അര്ദ്ധരാത്രിയായിരുന്നു ഭീകരരുടെ ഏഴ് താവളങ്ങളില് ഇന്ത്യന് സൈന്യം മിന്നലാക്രമണം നടത്തിയത്. ഉറിയിലെ ഇന്ത്യന് സൈനിക താവളം ഭീകരര് ആക്രമിച്ചതിന് തിരിച്ചടിയായിട്ടായിരുന്നു ഈ ആക്രമണം.
