കൊച്ചി: ഹരിതകേരളം മിഷന് കീഴില് തോട്ടറപ്പുഞ്ച ഇക്കൊല്ലവും നീരണിയുന്നു. കൊച്ചിയുടെ നെല്ലറയായ തോട്ടറയില് 550 ഏക്കറില് കൃഷിയിറക്കി 1500 ടണ് നെല്ലിന്റെ വിളവെടുപ്പാണ് ജില്ലാ ഭരണകൂടം ലക്ഷ്യമിടുന്നത്. വിളവെടുക്കുന്ന നെല്ല് സംസ്കരിച്ച് അരിയാക്കി തോട്ടറ ബ്രാന്ഡില് വിപണിയിലെത്തിക്കും. ഇതിനുള്ള മില്ല് 40 ലക്ഷം രൂപ മുതല്മുടക്കില് തോട്ടറ മേഖലയില് സ്ഥാപിക്കും. കുടുംബശ്രീക്കാണ് മില്ല് നടത്തിപ്പിന്റെ ചുമതല.
ആമ്പല്ലൂര്, എടക്കാട്ടുവയല്, കോട്ടയം ജില്ലയിലെ വെള്ളൂര് എന്നീ ഗ്രാമപഞ്ചായത്തുകളിലായി വ്യാപിച്ചു കിടക്കുന്ന തോട്ടറപ്പുഞ്ചയ്ക്ക് 1200 ഏക്കറാണ് വിസ്തൃതി. എടക്കാട്ടുവയല് പഞ്ചായത്തിലെ കൈപ്പട്ടൂര്, തോട്ടറ, അയ്യക്കുന്നം ആമ്പല്ലൂര് ഗ്രാമപഞ്ചായത്തിലെ മനക്കത്താഴം, കുന്നംകുളം, തോട്ടറ, തൊള്ളിക്കരി, വിരിപ്പച്ചാല്, കണ്ണങ്കേരി എന്നീ ഒമ്പത് പാടശേഖരങ്ങളാണ് വിത്തിറക്കലിന് സജ്ജമാകുന്നത്. കൃഷി, ജലസേചന വകുപ്പുകള്ക്ക് പുറമെ എടക്കാട്ടുവയല്, ആമ്പല്ലൂര് ഗ്രാമപഞ്ചായത്തുകള്, കേരള ലാന്ഡ് ഡവലപ്മെന്റ് കോര്പ്പറേഷന്, വൈദ്യുതി ബോര്ഡ് എന്നിവയും കര്ഷകര്ക്ക് വേണ്ട സഹായം നല്കും.
ഡിസംബര് ആദ്യവാരം വിത്തിറക്കുന്നതിന് മുന്നോടിയായുള്ള പ്രാരംഭ പ്രവര്ത്തനങ്ങള് തോട്ടറപ്പുഞ്ചയില് അന്തിമഘട്ടത്തിലാണ്. ഏപ്രില് അവസാനവാരമാണ് വിളവെടുപ്പ്. തോട്ടറയിലെ നെല്ല് സംസ്കരിക്കുന്നതിനുള്ള മില്ല് സ്ഥാപിക്കുന്നതിനായി 40 ലക്ഷം രൂപയാണ് കുടുംബശ്രീക്ക് അനുവദിച്ചത്. മില്ല് ഉടനെ പ്രവര്ത്തനസജ്ജമാകും. കര്ഷകര്ക്ക് വിദഗ്ധ പരിശീലനം നല്കുന്നതിനായി ആത്മ(അഗ്രിക്കള്ച്ചര് ടെക്നോളജി മാനേജ്മെന്റ് ഏജന്സി)യുടെ ആഭിമുഖ്യത്തിലുള്ള പ്രത്യേക പരിപാടി നാളെ എടക്കാട്ടുവയലില് നടക്കും.
