തൃശൂര്: തൃശൂര്-കുന്നംകുളം സ്റ്റേറ്റ് ഹൈവേയില് ശോഭാസിറ്റിയുടെ മുന്വശത്ത് മേല്പ്പാലം അനിവാര്യമെന്ന് ബസ്സുടമകള്. വേനല്ക്കാലാവധിയില് തൃശൂര് ടൗണിലെ ഗതാഗതക്കുരുക്ക് രൂക്ഷമാണ്. ഏറ്റവും കൂടുതല് ഗതാഗതതടസ്സം സൃഷ്ടിക്കുന്നത് ശോഭാസിറ്റിയുടെ മുന്ഭാഗത്താണ്. തൃശൂര് ഭാഗത്ത് നിന്ന് കുന്നംകുളം ഭാഗത്തേക്കും തിരിച്ചും വരുന്ന വാഹനങ്ങളെയാണ് ഇത് ഏറ്റവും കൂടുതല് ബാധിക്കുന്നത്.
ശോഭാസിറ്റിയും അതിലെ ആറ് തീയേറ്ററുകള് ഉള്പ്പെടുന്ന മാളും തുറന്നപ്പോള് അവിടെ ഉണ്ടാകുന്ന ഗതാഗതക്കുരുക്ക് രൂക്ഷമാണ്. പ്രത്യേകിച്ച് ആഴ്ചകളുടെ അവസാന ദിവസങ്ങളിലും സിനിമകള് മാറുന്ന സമയത്തും വന് ഗതാഗതസ്തംഭനമാണ് ഉണ്ടാകുന്നത്.
പലതരത്തിലുള്ള നിര്ദ്ദേശങ്ങളും പലഭാഗത്തുനിന്നും ഉയരുന്നുണ്ടെങ്കിലും ശരിയായ പ്രതിവിധി മേല്പ്പാലം തന്നെയാണ്. ശബരിമലയില് ദര്ശനം നടത്താന് പോകുന്ന അമ്പത് ലക്ഷത്തില്പ്പരം ഭക്തര് മലക്കുപോകുമ്പോഴോ, തിരിച്ചുവരുമ്പോഴോ ഗുരുവായൂര് ക്ഷേത്രത്തില് ദര്ശനം നടത്തുക പതിവാണ്. അന്യസംസ്ഥാനത്തുനിന്നു വരുന്ന ഭക്തജനങ്ങള് പൂര്ണമായും കടന്നുപോകുന്നത് ഈ റോഡ് വഴിയാണ്.
തൃശൂര്-കുന്നംകുളം സ്റ്റേറ്റ് ഹൈവേയില് സര്വീസ് നടത്തുന്ന ബസ്സുകളെ സംബന്ധിച്ച് ശോഭാസിറ്റിയുടെ മുന്ഭാഗത്തെ ഗതാഗതക്കുരുക്ക് ഒരു പേടിസ്വപ്നമായിമാറിയിരിക്കുകയാണ്.
ബസ്സുകള്ക്ക് സമയത്തിന് സര്വീസ് നടത്താന് കഴിയാത്തതിനാല് ട്രിപ്പുകള് പൂര്ത്തീകരിക്കുവാന് കഴിയുന്നില്ല. ഇന്ധന നഷ്ടത്തിനും കാരണമാകുന്നുണ്ട്. ശോഭാസിറ്റിയുടെ മുന്വശത്ത് തൃശൂര് – കുന്നംകുളം സ്റ്റേറ്റ് ഹൈവേയില് ഫ്ളൈ ഓവര് പണിയുന്നതിനുള്ള നടപടികള് സ്വീകരിക്കണമെന്ന് പ്രൈവറ്റ് ബസ്സ് ഓപ്പറേറ്റേഴ്സ് ഭാരവാഹികളായ എം.എസ്.പ്രേംകുമാര്, ആന്റോ ഫ്രാന്സിസ്, ടി.കെ.നിര്മ്മലാനന്ദന് എന്നിവര് ആവശ്യപ്പെട്ടു.
